హైదరాబాద్, వెలుగు: తెలంగాణలో బీజేపీ మెజార్టీ సీట్లను గెలుస్తుందని మాజీ గవర్నర్, బీజేపీ నేత తమిళిసై ధీమా వ్యక్తం చేశారు. పార్లమెంట్ ఎన్నికల్లో ఎవరికి ఓటు వేయాలో ప్రజలు ఇప్పటికే డిసైడ్ అయ్యారని చెప్పారు. మూడోసారి బీజేపీ అధికారంలోకి వస్తుందన్నారు. ప్రతి కుటుంబంలో ఒకరు కేంద్ర ప్రభుత్వ లబ్ధిదారుగా ఉన్నారని, అదే తమకు బలంగా మారుతుందన్నారు. బీజేపీ స్టేట్ ఆఫీసులో మీడియాతో ఆమె మాట్లాడారు. తెలంగాణ ప్రజలకు కేంద్ర ప్రభుత్వ పథకాలతో ఎక్కువగా లబ్ధి చేకూరాలంటే మోదీని గెలిపించాలని కోరారు.
తాను గవర్నర్గా ఉన్నప్పుడు అప్పటి బీఆర్ఎస్ ప్రభుత్వం ప్రొటోకాల్ పాటించలేదని విమర్శించారు. రిజర్వేషన్ల అంశంలో బీజేపీపై కాంగ్రెస్ పార్టీ దుష్ప్రచారం చేస్తున్నదని, రాజ్యాంగాన్ని మార్చే ఉద్దేశం లేదని మోదీనే చెప్పారని గుర్తుచేశారు. నేషనల్ ఓబీసీ కమిషన్కు చట్టబద్ధత కల్పించడమే దీనికి నిదర్శనమన్నారు. ఈసారి ఎన్నికల్లో తమిళనాడులో మంచి ఫలితాలు సాధిస్తామని ఆమె ధీమా వ్యక్తం చేశారు. కాగా.. హైదరాబాద్ లో జరిగిన విశేష్ సంపర్క్ కార్యక్రమంలో తమిళిసై పాల్గొని, మాట్లాడారు.
