- మూడు నెలలు ఆలస్యంగా సీడ్ పంపిణీ
- అసలు లక్ష్యంలో సగం సీడ్తో ముందుకు
- చేపల ఎదుగుదల ఉండదనిమత్య్సకారుల వాదన
- అనుమానాలు వద్దంటున్న ఆఫీసర్లు
నిజామాబాద్, వెలుగు: జిల్లాలోని మత్య్సకారుల ఉపాధి కోసం ప్రభుత్వం అందించే ఉచిత చేప పిల్లల పంపిణీ లక్ష్యం నెరవేడంలేదు. గత బీఆర్ఎస్ ప్రభుత్వం ఫిష్ సీడ్ సరఫరా చేసే కాంట్రాక్టర్లకు బిల్స్సరిగా చెల్లించకపోవడంతో ఆర్థికంగా నష్టపోయి ఈ ఏడాది సీడ్ సప్లై చేసేందుకు ముందుకు రాలేదు. సర్కారు మారినందున ఇప్పుడలా జరగదని ఆఫీసర్లు వారిని ఒప్పించేసరికి మూడు నెలలు దాటిపోయింది. టార్గెట్లో సగం చేపలు పెంచి వారికి ఉపాధి కల్పించాలని అధికారులు సీడ్ సప్లై చేయగా ఇప్పుడు సీడ్ వేసి ప్రయోజనం లేదని మత్య్సాకార సంఘాలు అంటున్నాయి. ఫిష్ సీడ్ కోసం ఖర్చు చేసే నిధులు సంఘాలకు ఇస్తే మేలని చెబుతున్నారు.
రూ.2.05 కోట్లకు తగ్గించి..
జిల్లాలో 396 మత్య్సపారిశ్రామిక సంఘాలుండగా 23,657 మంది సభ్యులున్నారు. 967 చెరువులు, కుంటలు, రిజర్వాయర్లలో చేపల పెంపకంతో ఉపాధి పొందుతారు. ఇందుకు కావాల్సిన ఫిష్ సీడ్ను ప్రభుత్వం ఫ్రీగా అందిస్తుంది. మే నెలలో సీడ్ సరఫరాకు సంబంధించిన టెండర్లను ఆహ్వానించి జులైలోనే జలాశయాలలో సీడ్ వేయాలి. గత బీఆర్ఎస్ పాలనలో టెండర్లు తీసుకున్న కాంట్రాక్టర్లకు బిల్స్ రాకపోవడంతో ఈసారి సీడ్ సప్లయికి ముందుకు రాలేదు.
కాంగ్రెస్ ప్రభుత్వం సీడ్ ఫిష్ కోసం రూ.4.54 కోట్లు కేటాయించి పెంచి రెండు సార్లు టెండర్లు పిలిచినా రాలేదు. ఆఫీసర్లు ప్రత్యేక చొరవ తీసుకొని ముగ్గురు కాంట్రాక్టర్లను ఒప్పించగలిగారు. వర్షాకాలం ముగిసినందున అసలు ప్రణాళికను రూ.2.05 కోట్లకు కుదించారు. ఆ నిధులతో 2.27 కోట్ల చేపపిల్లలను జలాశయాలలో వదలాల్సి ఉండగా పంపిణీ షురూ చేశారు. సీజన్ ముగిశాక వేసే పిల్లలు పెరుగవని, నిధులను వృథా చేసే బదులు మత్య్సకారులకు పంచాలని సంఘాల నేతలు కోరుతున్నారు. ఈ మేరకు కలెక్టర్ రాజీవ్గాంధీ హనుమంతును గత వారం కలిసి వినతి పత్రం అందజేశారు.
వివిధ సైజ్ లలో చేపపిల్లలు
814 చెరువులలో 40 ఎంఎం సైజ్ సీడ్ 1.35 కోట్లు, 153 చెరువులలో 92 లక్షల 100 ఎంఎం సైజ్ పిల్లలు సప్లయి చేస్తున్నారు. గరిష్ఠంగా 8 నెలల పాటు నీరు నిలువ ఉంటేనే 40 ఎంఎం సీడ్ పెరుగుతుంది. నీటి నిలువ ఏడాది పాటు ఉండే రిజర్వాయర్లలో 100 ఎంఎం సీడ్ వదులుతారు. వీటి పర్యవేక్షణకు ఆఫీసర్లు, మత్య్సకారులతో కూడిన మూడు కమిటీలు ఏర్పాటు చేశారు.
అపోహలు వద్దు
సీడ్ పంపిణీలో కొంత జాప్యం జరిగిన విషయం నిజమే. దీనికి కారణాలు మత్స్య సంఘాలకు తెలుసు. నవంబర్ 15 లోగా చేప పిల్లల పంపిణీ ముగిస్తం. చేపలు పెరగవనే అపోహలు వద్దు. రోజుకు ఒక ఎంఎం చొప్పున పిల్లలు పెరిగి ఎనిమిది నెలల్లో కిలో బరువు తూగుతాయి. ట్రాన్స్పరెంట్ నీటిలో మాత్రమే ఫిష్ సీడ్ పెరగదు.
జిల్లాలో బ్లాక్ సాయిల్ పొటెన్షియల్ జలాశయాలే ఉన్నాయి. పక్కా పెరుగుతాయి. అనుమానాలు పెట్టుకోవద్దు. అలుగుల మీదుగా చేపలు బయటపడకుండా చూసుకుంటేచాలు. జిల్లాలో 35 వేల టన్నుల చేపల ఉత్పత్తిని అంచనా వేస్తున్నం.
- ఆంజనేయ స్వామి, ఏడీ ఫిషరీస్
