బీజింగ్: అమెరికా ప్రెసిడెంట్ డొనాల్డ్ ట్రంప్ విదేశాలపై ప్రకటించిన భారీ టారిఫ్ ల వల్ల ఆయా దేశాలకు వచ్చిన నష్టమేమీ లేదని.. వాస్తవానికి అమెరికన్ ప్రజలపైనే పన్నుల భారం పెరుగుతోందని చైనా హెచ్చరించింది. ఇప్పటివరకూ ట్రంప్ ఎంత టారిఫ్ లు పెంచితే.. తానూ అంత టారిఫ్లు పెంచుతూ వచ్చిన డ్రాగన్ కంట్రీ తాజాగా రూట్ మార్చింది. ట్రంప్ తీరుతో మీకే నష్టం అంటూ డైరెక్ట్గా అమెరికన్ ప్రజలకే మెసేజ్ పంపింది.
.టారిఫ్ల వల్ల విదేశాలకే ఇబ్బంది అవుతుంది కానీ, అమెరికన్లకు నష్టమేమీలేదన్న అభిప్రాయాన్ని తిప్పికొట్టేలా కౌంటర్ ఇచ్చింది. అమెరికాకు చెందిన ఓ వ్యాపారి మాట్లాడిన వీడియోను జతచేస్తూ చైనా విదేశాంగ శాఖ అధికార ప్రతినిధి మావో నింగ్ ఈ మేరకు ఆదివారం ‘ఎక్స్’లో పోస్ట్ పెట్టారు. తాను ఇంతకుముందు చైనా నుంచి అతి చౌకగా ఉత్పత్తులను దిగుమతి చేసుకునేవాడినని, ఇప్పుడు అవే ఉత్పత్తులను అమెరికాలో తయారు చేయించాలంటే వందల రెట్లు అధికంగా ఖర్చు అవుతోందంటూ ఆ వ్యాపారి వీడియోలో పేర్కొన్నారు.
‘‘టారిఫ్ లను ఫారిన్ కంట్రీస్ చెల్లిస్తాయని అనుకుంటున్నారా? లేదు. అమెరికన్ కంపెనీలు చెల్లిస్తాయి. తర్వాత ఆ ఖర్చులను మీపై వేస్తాయి. టారిఫ్ లతో మాన్యుఫాక్చరింగ్ రంగం తిరిగి పుంజుకోదు. టారిఫ్ లు అంటే కేవలం అమెరికన్ లపై ట్యాక్స్ లు వేయడమే” అని ఈ వీడియోకు మావో నింగ్ కామెంట్ పెట్టారు. కాగా, చైనాపై అమెరికా ఇప్పటివరకూ 145% టారిఫ్ లను ప్రకటించగా.. ప్రతీకారంగా చైనా 125% టారిఫ్ లను విధించింది. అయితే, చైనా నుంచి వచ్చే స్మార్ట్ ఫోన్లు, కంప్యూటర్లు, ఇతర పలు ఎలక్ట్రానిక్స్ వస్తువులపై మాత్రం టారిఫ్ లను ట్రంప్ మినహాయించారు.
