న్యూఢిల్లీ: మనదేశపు అతిపెద్ద బిజినెస్ గ్రూప్ టాటా కంపెనీల స్టాక్స్ మార్కెట్క్యాప్ 365 బిలియన్ డాలర్లు (దాదాపు రూ.30.3 లక్షల కోట్ల) దాటింది. ఇది పాకిస్తాన్ జీడీపీ అంచనాల కంటే ఎక్కువ ఉండటం విశేషం!. పాక్ ఎకానమీ విలువ సుమారు 341 బిలియన్ డాలర్లే! టాటా కన్సల్టెన్సీ సర్వీసెస్ (టీసీఎస్) విలువ దాదాపుగా 170 బిలియన్ డాలర్ల ( రూ.15 లక్షల కోట్లు)కు చేరింది. ఇది భారతదేశం రెండవ- అతిపెద్ద కంపెనీగా మాత్రమే కాకుండా, విపరీతమైన అప్పులతో సతమతమవుతున్న పాకిస్తాన్ ఆర్థిక వ్యవస్థలో దాదాపు సగానికి సమానం.
టాటా గ్రూప్‌‌లోని మార్కెట్ విలువలో ఇటీవలి పెరుగుదలకు టీసీఎస్, టైటాన్‌, టాటా పవర్ షేర్లలో బలమైన ర్యాలీలతో పాటు, టాటా మోటార్స్, ట్రెంట్‌‌లలో భారీ రాబడి కారణమని చెప్పవచ్చు. కొత్తగా మార్కెట్లో లిస్ట్ అయిన టాటా టెక్నాలజీస్‌‌తో సహా ఎనిమిది టాటా కంపెనీలు ఈ కాలంలో సంపదను రెట్టింపు చేసుకున్నాయి. ఈ కంపెనీలలో టీఆర్ఎఫ్, ట్రెంట్, బెనారస్ హోటల్స్, టాటా ఇన్వెస్ట్‌‌మెంట్ కార్పొరేషన్, టాటా మోటార్స్, ఆటోమొబైల్ కార్పొరేషన్ ఆఫ్ గోవా, ఆర్ట్‌‌సన్ ఇంజనీరింగ్ ఉన్నాయి. టాటా కెమికల్స్ షేర్ మాత్రమే గత 12 నెలలుగా తగ్గుతోంది.
