న్యూఢిల్లీ : రాబోయే ఐదేళ్లలో ఐదు లక్షల ఉద్యోగాలు ఇవ్వాలని లక్ష్యంగా పెట్టుకున్నట్టు టాటా గ్రూప్ ప్రకటించింది. సెమీ కండక్టర్స్, ఎలక్ట్రిక్ వెహికల్స్, సోలార్ ఇండస్ట్రీల ద్వారా పెద్ద ఎత్తున ఉపాధి కల్పిస్తామని టాటా సన్స్ చైర్మన్ చంద్రశేఖరన్ వెల్లడించారు. చిప్స్, బ్యాటరీలు, ఈవీలు, సోలార్ పవర్ ఎక్విప్మెంట్ తయారీ కోసం పెద్ద ఎత్తున ఫ్యాక్టరీలను నిర్మిస్తున్నామని ప్రకటించారు. రిటైల్, టెక్సర్వీసెస్, ఆతిథ్యరంగ సెక్టార్ల నుంచి కూడా పెద్ద ఎత్తున ఉపాధి అవకాశాలు లభిస్తాయని చంద్రశేఖరన్ అన్నారు.
‘‘ఈ ఏడాది మేం ఎన్నో మైలురాళ్లను అధిగమించాం. ఏడు ఫ్యాక్టరీలకు శంకుస్థాపన చేశాం. ఇండియాలోనే మొదటి సెమీకండక్టర్ ఫ్యాబ్ను గుజరాత్ నగరం ధొలెరాలో మొదలుపెట్టాం. కర్ణాటక నరసుపారాలో ఎలక్ట్రానిక్అసెంబ్లీ ప్లాంటును, తమిళనాడు పణక్కంలో ఆటోమోటివ్ ప్లాంటును, బెంగళూరులో ఎంఆర్ఓ ఫెసిలిటీని ఆరంభించాం. గుజరాత్ సాణంద్లో బ్యాటరీ సెల్ తయారీ ఫ్యాక్టరీని నిర్మించాం. తమిళనాడులోని తిరునెల్వేలిలో సోలార్ మాడ్యూల్ ప్రొడక్షన్ను మొదలుపెట్టాం”అని ఆయన వివరించారు.
