5.6 శాతం పెరిగిన రెవెన్యూ
ఒక్కో షేరుకు రూ.76 డివిడెండ్
న్యూఢిల్లీ: ఇండియాలోనే అతిపెద్ద ఐటీ కంపెనీ టీసీఎస్ డిసెంబరుతో ముగిసిన మూడో క్వార్టర్ ఫలితాలను ప్రకటించింది. ఈసారి నికరలాభం ఏడాది లెక్కన 12 శాతం పెరిగి రూ.12,380 కోట్లకు చేరుకుంది. అంతకుముందు ఏడాది డిసెంబరు క్వార్టర్లో రూ.11,058 కోట్ల లాభం వచ్చింది.
రెవెన్యూ 5.6 శాతం పెరిగి 63,973 కోట్లకు చేరింది. అయితే సీక్వెన్షియల్గా ఇది 0.4 శాతం తగ్గింది. ఖర్చులు 6.33 శాతం పెరిగి రూ.48,550 కోట్లకు చేరాయి. ఈసారి ఫలితాలు అంచనాలను అందుకోలేకపోయాయి.
మూడో క్వార్టర్లో కంపెనీకి రూ.64,748 కోట్ల రెవెన్యూ, 12,534 కోట్ల నికరలాభం వస్తుందన్న ఎనలిస్టుల అంచనాలు నిజం కాలేదు. ఆర్డర్ బుక్ టోటల్ కాంట్రాక్ట్ వాల్యూ (టీసీవీ) మాత్రం 10.2 బిలియన్ డాలర్లకు చేరింది.
ఇది మొదటి క్వార్టర్లో 8.3 బిలియన్ డాలర్లు, రెండో క్వార్టర్లో 8.6 బిలియన్ డాలర్లు ఉంది. అన్ని కేటగిరీల్లో టీసీవీ భారీగా పెరిగినందుకు సంతోషంగా ఉందని టీసీఎస్ సీఈఓ, ఎండీ కృతివాసన్ అన్నారు.
బీఎఫ్ఎస్ఐ, సీబీజీ వెర్టికల్స్ కూడా వృద్ధిబాటలోకి వచ్చాయని అన్నారు. ఇక నుంచి కూడా అప్స్కిల్లింగ్, ఏఐలో పెట్టుబడులను కొనసాగిస్తామని చెప్పారు. ఇదిలా ఉంటే కంపెనీ షేరుకు రూ.76 చొప్పున డివిడెండ్, రూ.66 చొప్పున స్పెషల్ డివిడెండ్ ప్రకటించింది.
విదేశీ మార్కెట్లలో ఇలా...
అమెరికా, యూరప్ మార్కెట్లు ఆదాయం పరంగా నిలకడగా ఉన్నాయి. ఇండియా మార్కెట్ 79.2 శాతం పెరిగింది. మిడిల్ ఈస్ట్– ఆఫ్రికా 15 శాతం, ఆసియా–పసిఫిక్ 5.8 శాతం, లాటిన్ అమెరికా ఏడు శాతం పెరిగింది. ఉత్తర అమెరికా నుంచి ఆదాయం 2.3 శాతం తగ్గింది.
యూరప్, యూకేలు 4.1 శాతం పెరగగా, యూరప్ మార్కెట్ 1.5 శాతం తగ్గింది. వర్టికల్స్ను గమనిస్తే.. రిసోర్సెస్ అండ్యుటిలిటీస్ 3.4 శాతం, కన్జూమర్ బిజినెస్ 1.1 శాతం, బీఎఫ్ఎస్ఐ0.9 శాతం పెరిగింది. ఈ క్వార్టర్లో ఉద్యోగుల సంఖ్య 5,370 తగ్గగా, రెండో క్వార్టర్లో మాత్రం 5,762 మందికి ఉద్యోగాలు ఇచ్చారు.
గత డిసెంబరు నాటికి మొత్తం ఉద్యోగుల సంఖ్య 6.7 లక్షలకు చేరింది. తాజా క్వార్టర్లో ఆపరేటింగ్ మార్జిన్లు 24.5 శాతం ఉన్నాయి. ఏడాది లెక్కన ఇవి 50 బేసిస్ పాయింట్లు తగ్గాయి. బీఎస్ఈలో గురువారం కంపెనీ షేరు 0.68 శాతం తగ్గి రూ.4,036 వద్ద ముగిసింది.
