టీడీపీ సభకు భారీగా తరలివచ్చిన జనం
క్యాడర్లో జోష్ నింపిన బాబు ప్రసంగం
ఖమ్మం/ ఖమ్మం టౌన్, వెలుగు : ఖమ్మంలోని సర్దార్ పటేల్ స్టేడియంలో బుధవారం జరిగిన టీడీపీ ‘శంఖారావం’ బహిరంగ సభ.. ఆ పార్టీ క్యాడర్లో జోష్ నింపింది. టీడీపీ అధినేత చంద్రబాబు నాయుడు రావడంతో కార్యకర్తలు, అభిమానులు వేలాదిగా తరలివచ్చారు. సభాప్రాంగణం, పరిసర ప్రాంతాలు పార్టీ కార్యకర్తలతో కిక్కిరిశాయి. ఉమ్మడి ఖమ్మం, వరంగల్, నల్గొండ జిల్లాల్లోని 25 అసెంబ్లీ నియోజకవర్గాల నుంచి టీడీపీ శ్రేణులు భారీగా తరలివచ్చారు. స్టేడియం నిండి చాలా మంది రోడ్లపైనే నిలిచిపోవడంతో అక్కడ ఏర్పాటుచేసిన బిగ్ స్క్రీన్లపై చంద్రబాబు ప్రసంగాన్ని చూశారు.
భారీ ర్యాలీ..
వరంగల్ క్రాస్ రోడ్ నుంచి బైక్ ర్యాలీతో చంద్రబాబుకు వెల్ కమ్ చెప్పారు. అక్కడి నుంచి కాల్వొడ్డు, మయూరి సెంటర్, జడ్పీ సెంటర్, ఇల్లందు క్రాస్ రోడ్ మీదుగా సభావేదిక సర్దార్ పటేల్ స్టేడియానికి చేరుకున్నారు. గిరిజన నృత్యాలు, కొమ్ము డ్యాన్సులు, భారీ వాహన శ్రేణి, కార్యకర్తలతో రోడ్లు నిండాయి. ఈ కార్యక్రమంలో తెలుగుదేశం పార్టీ రాష్ట్ర అధ్యక్షులు కాసాని జ్ఞానేశ్వర్ ముదిరాజ్ , రాష్ట్ర ప్రధాన కార్యదర్శి తాళ్లూరి జీవన్ కుమార్, ఖమ్మం పార్లమెంట్ అధ్యక్షుడు కూరపాటి వెంకటేశ్వర్లు, రాష్ట్ర పార్టీ ఉపాధ్యక్షుడు వాసిరెడ్డి రామనాథం, రాష్ట్ర ప్రచార కార్యదర్శి చంద్రహాస్, జిల్లా ప్రధాన కార్యదర్శి కేతినేని హరీశ్ పాల్గొన్నారు.
బీఆర్ఎస్ వీఆర్ఎస్ తీసుకోవడమే..
తెలంగాణ సెంటిమెంట్ తో అధికారంలోకి వచ్చిన బీఆర్ఎస్ ఇకపై వీఆర్ఎస్ తీసుకోవడమేనని టీడీపీ నాయకులు ఎద్దేవా చేశారు. ఈ సందర్భంగా పలువురు లీడర్లు మాట్లాడుతూ.. తెలంగాణలో తెలుగుదేశం నిర్వీర్యం అయిందనే వారికి ఈ సభ చెంప పెట్టు అన్నారు.ఈ బహిరంగ సభకు వచ్చిన ప్రజానికాన్ని చూసి కేసీఆర్ కు వెన్నులో వణుకు పుడుతుందన్నారు. ఖమ్మంలో 10కి 10 సీట్లు టీడీపీ గెలుచుకుంటుందని ధీమా వ్యక్తం చేశారు.
