- 400 సీసీ కెమెరాల ఆధారంగా నిందితుల అరెస్ట్
సికింద్రాబాద్, వెలుగు: బ్యాంకులో డబ్బులు డిపాజిట్ చేసేందుకు వెళ్తున్న వ్యక్తిని అడ్డగించి, రూ.2.13 లక్షలు కొట్టేసిన ఇద్దరితోపాటు ఈ చోరీకి ప్లాన్ వేసిన మరో వ్యక్తిని బేగంపేట పోలీసులు అరెస్టు చేశారు. ఈ కేసు వివరాలను ఏసీపీ గోపాలకృష్ణమూర్తి, సీఐ చిర్రా రామయ్య కలిసి సోమవారం వెల్లడించారు.
ఉప్పల్ చిలుకానగర్కు చెందిన బండారిపల్లి సాయిరామ్(23), మోరంషెట్టి శ్రీహరి(23), చావన్ లోకేశ్(18) స్నేహితులు. వీరిలో శ్రీహరి, లోకేశ్ డెలివరీ బాయ్స్గా పని చేస్తుండగా, సాయిరామ్ రసూల్పురాలోని కుమార్ వేలు బ్రదర్స్ డిస్ట్రిబ్యూటరీ సెంటర్ ఎదురుగా టీ-స్టాల్ నిర్వహిస్తున్నాడు. అయితే, కస్టమర్ల నుంచి వచ్చిన డబ్బులను ఈ డిస్ట్రిబ్యూటరీ నిర్వాహకులు ప్రతి రోజూ సికింద్రాబాద్ఎంజీ రోడ్డులోని కాస్మో బ్యాంకులో జమ చేస్తుంటారు. ఈ విషయాన్ని సాయిరామ్ గమనించి, తన ఇద్దరు మిత్రులతో కలిసి డబ్బులు కొట్దేద్దామని ప్లాన్ వేశాడు.
ప్లాన్లో భాగంగా ఈ నెల 26న బ్యాంక్కు వెళ్తున్న వేలు బ్రదర్స్ డిస్ట్రిబ్యూటరీ సెంటర్ మేనేజర్ను శ్రీహరి, లోకేశ్ ముఖాలకు మాస్క్లు ధరించి, నంబర్ ప్లేట్ లేని హోండా యాక్టివా పై వచ్చి అడ్డగించారు. అతని వద్ద ఉన్న రూ.2.13లక్షల బ్యాగును లాక్కొని ఉడాయించారు. బాధితుడి ఫిర్యాదుతో బేగంపేట పోలీసులు కేసు నమోదు చేసి దర్యాప్తు చేపట్టారు.
ఆ మార్గంలోని దాదాపు 400ల సీసీ కెమెరాల ఫుటేజీని పరిశీలించి, చివరకు శ్రీహరి, లోకేశ్ను వారి ఇండ్ల వద్ద సోమవారం అరెస్టు చేశారు. తదుపరి విచారణలో ఈ చోరీకి సూత్రదారి అయిన సాయిరామ్ను అదుపులోకి తీసుకొని, రూ.2 లక్షలు,మూడు సెల్ఫోన్లు, బైక్ను స్వాధీనం చేసుకున్నారు.
