- చాక్లెట్స్ ఆశచూపి 3వ తరగతి స్టూడెంట్లతో అసభ్య ప్రవర్తన
- వివరాలు బయట పెట్టిన ఓ విద్యార్థిని
- పీఎస్ ఎదుట పేరెంట్స్ ఆందోళన
- పోలీసుల అదుపులో టీచర్
- మరో 4 నెలల్లో రిటైర్ మెంట్
- యాదాద్రి జిల్లా గుండాల ప్రైమరీ స్కూల్లో ఘటన
మోత్కూరు, వెలుగు : విద్యాబుద్ధులు చెప్పాల్సిన ఓ టీచర్ బుద్ధి దారి తప్పింది. కొంతకాలంగా మనవరాళ్ల వయస్సున్న విద్యార్థినులతో అసభ్యంగా ప్రవర్తిస్తున్నాడు. చాక్లెట్స్ ఇస్తానని ఆశచూపి వికృత చేష్టలకు దిగడంతో ఓ విద్యార్థిని అతడి గుట్టు బయటపెట్టింది. దీంతో కీచక టీచర్ను అదుపులోకి తీసుకున్న పోలీసులు పోక్సో కేసు నమోదు చేశారు. పేరెంట్స్, స్టూడెంట్స్కథనం ప్రకారం.. యాదాద్రి భువనగిరి జిల్లా గుండాల ప్రైమరీ స్కూల్లో 25 మంది స్టూడెంట్లు చదువుతున్నారు. అండెం మాధవరెడ్డి, నాగరాజు ఇక్కడి టీచర్లు. ఇందులో మాధవరెడ్డి ఏడాదిగా 3వ తరగతి చదువుతున్న ఆరుగురు స్టూడెంట్లతో అసభ్యంగా ప్రవర్తిస్తున్నాడు. చాక్లెట్స్ ఇస్తూ క్లాస్ రూంలో బట్టలు విప్పి చేతులతో తడుముతూ అసభ్యంగా ప్రవర్తిస్తున్నాడు.
ఎవరైనా బయటకు చెబుతారని అనుమానం వస్తే కొట్టి భయపెడుతున్నాడు. చేతి వేళ్ల మధ్య కర్ర పెట్టి మెలి తిప్పుతూ బెదిరిస్తున్నాడు. ఈ క్రమంలో ఓ విద్యార్థిని స్కూల్కు వెళ్లడం మానేసింది. పేరెంట్స్ ఆరా తీయగా టీచర్ చేష్టల గురించి చెప్పింది. దీంతో మిగిలిన స్టూడెంట్స్ తల్లిదండ్రులకు చెప్పగా వారు తమ పిల్లలను ఆరా తీశారు. వారు కూడా జరిగిందంతా చెప్పారు. ఆగ్రహించిన పేరెంట్స్ స్కూల్ కు వెళ్లగా అప్పటికే టీచర్ మాధవరెడ్డి ఇంటికి వెళ్లిపోయాడు. దీంతో పిల్లలను తీసుకొని పీఎస్కు వెళ్లి ఆందోళన చేశారు. మాధవరెడ్డిపై ఫిర్యాదు చేయడంతో అతడిని అదుపులోకి తీసుకున్నామని, పోక్సో కేసు పెట్టామని ఎస్సై యాకయ్య తెలిపారు. టీచర్ మాధవరెడ్డి మరో నాలుగు నెలల్లో పదవీ విరమణ చేయబోతున్నారు. టీచర్కు దూరపు బంధువైన ఓ పొలిటికల్ లీడర్ విషయాన్ని పెద్దది చేయకుండా చూడాలని ప్రయత్నిస్తున్నట్టు సమాచారం.
