తెలంగాణ ప్రభుత్వ విద్యా శాఖ అధికారులు ప్రభుత్వ పాఠశాలలో జరుగుతున్న ప్రతి విషయం మొబైల్ యాప్లో నమోదు చెయ్యాలని ఆదేశాలు జారీ చెయ్యడంతో పాఠశాల తరగతి గదిలో జరిగే బోధన మొత్తం వివిధ రకాల మొబైల్ యాప్ల చుట్టూ తిరుగుతోంది. పాఠశాల ఉదయం ప్రారంభం కాగానే మొదటి పిరియడ్లో తరగతి గదికి వెళ్లిన క్లాస్ టీచర్ హాజరు రిజిస్టర్ లో విద్యార్థుల హాజరు తీసుకోవడంతో పాటు ఫేస్ రికగ్ననేషన్ అనే యాప్లోవిద్యార్థుల ఫొటోలు అప్లోడ్ చెయ్యాలి. ఈ ప్రక్రియ మొత్తం పూర్తి కావడానికి సుమారు 30 నిమిషాల సమయం పడుతుంది. ఈ సమయం పోగా బోధనకు 15నిమిషాలు మాత్రమే మిగులుతది.
ఉన్నత పాఠశాలలో ఉన్నత, ప్రాథమిక పాఠశాలలో తొలి మెట్టు అనే బోధన కార్యక్రమాలు రూపొందించడం జరిగింది. ఈ కార్యక్రమాల మీద ఉపాధ్యాయులకు శిక్షణ ఇచ్చి వీటి ప్రకారమే బోధన చెయ్యాలని నిర్దేశించడం జరిగింది. ఈ బోధన కార్యక్రమాల ప్రకారం విద్యార్థులకు ప్రతినెల పరీక్ష నిర్వహించి, విద్యార్థులు సాధించిన ప్రగతిని, తెలంగాణ స్కూల్ ఎడ్యుకేషన్ యాప్లో ప్రతి నెల నమోదు చెయ్యాలి. విద్యార్థులకు పాఠశాలలో నిర్వహించే ఫార్మేటివ్ అసెస్మెంట్, సమ్మెటివ్ అసెప్మెంట్ పరీక్షలు నిర్వహించడం జరుగుతుంది. వీటిలో సాధించిన విద్యార్థుల ప్రగతిని కూడా ఆన్లైన్లో నమోదు చెయ్యాలి. మధ్యాహ్న భోజనం చేసిన విద్యార్థుల సంఖ్యను, అల్పాహారం చేసిన విద్యార్థుల సంఖ్యను కూడా మొబైల్ యాప్లో నమోదు చెయ్యాలి. పాఠశాలలో ఉపాధ్యాయులు రోజు మొత్తం మొబైల్ యాప్లతో కుస్తీ పడడంతో విద్యాబోధన సరిగా చేయలేకపోతున్నారు.
- పల్లె నాగరాజుటిఫిటిఎఫ్, ములుగు జిల్లా ప్రధాన కార్యదర్శి
