నల్గొండ – ఖమ్మం – వరంగల్ గ్రాడ్యుయేట్ ఎమ్మెల్సీ స్థానానికి జరిగిన ఉప ఎన్నికలో కాంగ్రెస్ అభ్యర్థి తీన్మార్ మల్లన్న ముందంజలో ఉన్నారు. రెండో రౌండ్ లో 96 వేల ఓట్ల మొదటి ప్రాధాన్యత ఓట్ల లెక్కింపు పూర్తయ్యింది. మొదటి ప్రాధాన్యత ఓట్ల రెండో రౌండ్ లో తీన్మార్ మల్లన్న 6 వేలకు పైగా ఓట్లతో లీడ్ లో కొనసాగుతున్నారు. చెల్లని ఓట్లు వేరు చేసే ప్రక్రియ కొనసాగుతుంది.
ఈ ఎన్నికల్లో 52 మంది అభ్యర్థులు పోటీ చేయడంతో జంబో బ్యాలెట్ను వాడాల్సి వచ్చింది. కాంగ్రెస్, బీఆర్ఎస్, బీజేపీ మధ్య హోరాహోరీగా జరిగిన ఈ ఉప ఎన్నికలో ప్రతి ఓటు కీలకంగా మారింది. దీంతో కౌంటింగ్ హాల్లో ఏజెంట్లు, అభ్యర్థులు ప్రతి బ్యాలెట్ను క్షుణ్ణంగా పరిశీలిస్తున్నారు. తొలి ప్రాధాన్యత ఓట్ల లెక్కింపు ప్రక్రియ గురువారం సాయంత్రం వరకు పూర్తయ్యే అవకాశం కనిపిస్తున్నది.
అధికారుల అంచనా మేరకు ప్రతి మూడు గంటలకోసారి ఒక రౌండ్ ఫలితం ప్రకటించాలి. కానీ జంబో బ్యాలెట్ కావడంతో ఓపెన్ చేసిన ప్రతి బ్యాలెట్ పేపర్ను మూడు టేబుళ్లకు మార్చాల్సి వస్తున్నది. బ్యాలెట్ పేపరు పెద్దగా ఉండటం, టేబుళ్లు చిన్నగా ఉండటంతో ఓపెన్ చేసిన బ్యాలెట్ పేపర్ను ఏజెంట్లు క్షుణంగా పరిశీలించి ఓకే చెప్పాకే తిరిగి క్లోజ్ చేయాల్సి వస్తున్నది. దీంతో ఓట్ల లెక్కింపు కోసం చాలా టైం పడుతున్నది.
