హైదరాబాద్, వెలుగు: చెరువుల ఆక్రమణలకు సహకరించాడనే అభియోగంపై నమోదైన కేసులో బాచుపల్లి తహసీల్దార్ పూల్‌ సింగ్‌కు హైకోర్టులో ఊరట లభించింది. నిజాంపేట మున్సిపాల్టీలోని ప్రగతినగర్‌ లోని 3 ఎకరాల ఆక్రమణలకు సహకరించారంటూ పూల్‌సింగ్‌పై హైడ్రా కమిషనర్‌ ఫిర్యాదు మేరకు పోలీసులు కేసు నమోదు చేశారు.
నిజాంపేట మున్సిపల్‌ కమిషనర్‌ రామకృష్ణరావు, బాచుపల్లి తహసీల్దార్ పూల్‌సింగ్‌, సర్వే శాఖ సహాయ డైరెక్టర్‌ కె. శ్రీనివాసులు, సహాయ ప్లానింగ్‌ అధికారి సుధీర్‌ కుమార్‌లపై ఆగస్టు 30న పోలీసులు కేసు పెట్టారు. ఈ కేసులో ముందస్తు బెయిల్‌ మంజూరు చేయాలంటూ పూల్‌సింగ్‌ దాఖలు చేసిన పిటిషన్‌ను జస్టిస్‌ కె. సుజన గురువారం విచారించి ముందస్తు బెయిల్‌ మంజూరు చేశారు.
