నాలుగేండ్లుగా రైతులను తిప్పలు పెడుతున్న భూ సమస్యలు, వివాదాలను పరిష్కరించే దిశగా రాష్ట్ర ప్రభుత్వం ముందడుగు వేసింది. ‘ధరణి– ఆర్ఓఆర్ 2020’ చట్టం స్థానంలో ‘తెలంగాణ భూ భారతి ఆర్ఓఆర్ 2024’ బిల్లును తీసుకొచ్చింది. రైతులకు ఇబ్బంది లేకుండా భూ సమస్యలను ఫీల్డ్ లెవెల్లో సులువుగా పరిష్కరించడమే కాకుండా.. ప్రభుత్వ భూములను కాపాడడంతోపాటు తప్పులు చేసే అధికారులపై కఠిన చర్యలు తీసుకునేలా ఈ బిల్లును రూపొందించినట్లు ప్రభుత్వం ప్రకటించింది. ఇప్పటివరకు ఉన్న చట్టంలో సివిల్ కోర్టుకు వెళ్లడం తప్పితే అప్పీల్స్కు అవకాశం లేదు.దీంతో కొత్తగా తెస్తున్న చట్టంలో ఆర్డీవో, కలెక్టర్ స్థాయిలో అప్పీల్స్ను ఏర్పాటు చేయడమే కాకుండా.. ల్యాండ్ ట్రిబునళ్లను కూడా తీసుకురానున్నారు. ఇవే ఫైనల్ ఆర్డర్స్ ఇవ్వనున్నాయి
ధరణి తప్పులకు చెక్
ధరణిలో ఉన్న తప్పులు, లోపాలన్నింటిని భూభారతిలో సవరించారు. బిల్లులో ఉన్న ప్రధానంశాల ప్రకారం.. ఇన్నాళ్లూ ఒక్క పట్టాదారు పేరుకే పరిమితమైన పాస్బుక్కుల్లో త్వరలో అనుభవదారు కాలమ్ రానుంది. పట్టాదారులకు ఎలాంటి ఇబ్బంది లేకుండా.. గతంలో ధరణి వచ్చిన తర్వాత ఖాస్తులో ఉండి ఇబ్బంది పడిన రైతులకు అనుభదారు/ఖాస్తు కాలమ్ పెట్టనున్నారు. విస్తీర్ణం మిస్ అయిందనో.. పేరు తప్పు పడిందనో.. ఇలాంటి ఏదైనా భూసమస్య వస్తే ఇప్పుడున్న 33 మాడ్యుల్స్లో ఏ మాడ్యుల్లో అప్లై చేసుకోవాలో తెలియని గందరగోళానికి కూడా కొత్త చట్టంతో చెక్ పడనుంది.
Also Read :- బంగాళాఖాతంలో బ‌ల‌ప‌డిన అల్పపీడ‌నం
కేవలం ఆరు మాడ్యుళ్లతోనే ధరణి స్థానంలో భూభారతి రాబోతున్నది. అంతా ఆన్లైన్ లో జరుగుతున్నప్పటికీ.. 2014కు ముందు రెవెన్యూ రికార్డుల నిర్వహణ, జమాబందీ ఎలా ఉండేదో ఇకపైనా అలాగే కొనసాగించనున్నారు. పదకొండు కాలమ్స్ తో జమాబందీ, గ్రామ రెవెన్యూ రికా ర్డుల నిర్వహణ చేపట్టనున్నారు. ధరణిలో వివాదాస్పదమైన 18 లక్షల ఎకరాల పార్ట్ బీ భూములకూ కొత్త చట్టంలో పరిష్కారం చూపించనున్నారు. ప్రస్తుత చట్టం ప్రకారం ధరణి నుంచి భూ భారతి పోర్టల్లోకి వివరాలు వస్తాయి. అయితే వ్యవసాయ, వ్యవసాయేతర, అబాదీ (గ్రామకంఠం) భూములన్నింటిని డ్రోన్ లేదా ఇతర సర్వే కార్యక్రమాల తర్వాత ప్రతి భూ కమతాన్ని మ్యాపింగ్ చేసి భూభారతితో శాశ్వాతంగా భూధార్ నంబర్ను కేటాయిస్తారు.
