- ఈ నెల 14 నుంచి ప్రజాపాలన విజయోత్సవాలు
- ఏర్పాట్లపై అధికారులకు సీఎస్ శాంతికుమారి ఆదేశాలు
హైదరాబాద్, వెలుగు: రాష్ట్రంలో ప్రజాప్రభుత్వం ఏర్పడి ఏడాది పూర్తవుతున్న నేపథ్యంలో ఈ నెల 14 నుంచి డిసెంబర్ 9 వరకు 26 రోజుల పాటు రాష్ట్ర వ్యాప్తంగా పెద్ద ఎత్తున ప్రజా విజయోత్సవాలు నిర్వహించేందుకు సర్కారు నిర్ణయించింది. మొదటి రోజు (14న) మాజీ ప్రధాని జవహర్ లాల్ నెహ్రూ జయంతి (బాలల దినోత్సవం) సందర్భంగా ఎల్బీ స్టేడియంలో దాదాపు 14 వేల మంది ప్రభుత్వ, గురుకుల పాఠశాలకు చెందిన విద్యార్థులతో విద్యా దినోత్సవాన్ని నిర్వహించనున్నట్టు సీఎస్ శాంతికుమారి తెలిపారు.
ఈ కార్యక్రమంలో సీఎం రేవంత్ రెడ్డి పాల్గొంటారని సీఎస్ స్పష్టం చేశారు. ఈ మేరకు కార్యక్రమ ఏర్పాట్లపై సోమవారం సెక్రటేరియెట్లో సంబంధిత అధికారులతో సమీక్షించారు. ఈ ఏడాది కాలంలో విద్యార్థుల కోసం ప్రభుత్వం చేసిన గణనీయమైన మార్పులపై చర్చించనున్నట్టు పేర్కొన్నారు. డైట్ చార్జీల పెంపు, బడుల్లో మౌలిక సదుపాయాల కల్పన, ఇంటిగ్రేటెడ్ స్కూళ్ల ఏర్పాటు, సర్కారు బడులకు ఉచిత కరెంట్ తదితర అనేక కార్యక్రమాలను ప్రభుత్వం చేసిందని గుర్తుచేశారు.
ఈ సందర్బంగా పాఠశాల విద్యార్థులతో మోడల్ అసెంబ్లీ, సాంస్కృతిక కార్యక్రమాల ఏర్పాటు, ఈ ఏడాది కాలంలో విద్యాశాఖలో మార్పులు, అభివృద్ధిపై ఏవీ ప్రదర్శన ఉంటుందని పేర్కొన్నారు. విద్యాశాఖపై ప్రత్యేకంగా రూపొందించిన సావనీర్ ను ముఖ్యమంత్రి ఆవిష్కరిస్తారని వెల్లడించారు. ఎల్బీ స్టేడియంలో మధ్యాహ్నం నిర్వహించే ఈ కార్యక్రమంలో విద్యార్థులు ఇబ్బంది పడకుండా చూడాలని అధికారులను సీఎస ఆదేశించారు.
