ఖమ్మం, వెలుగు: ఉమ్మడి ఖమ్మం జిల్లాలో బీఆర్ఎస్ నుంచి కాంగ్రెస్లోకి వలసలు పెరుగుతున్నాయి. ఇప్పటికే మాజీ మంత్రి తుమ్మల నాగేశ్వరరావు చేరిక దాదాపు ఖరారు కాగా.. మాజీ ఎమ్మెల్సీ బాలసాని లక్ష్మీనారాయణ, వైరా మాజీ ఎమ్మెల్యే చంద్రావతి క్యూలో ఉన్నట్టు టాక్ నడుస్తోంది. వీరిద్దరు బీఆర్ఎస్ హైకమాండ్పై నారాజ్గా ఉన్నట్టు గుర్తించిన కాంగ్రెస్ పెద్దలు వారితో సంప్రదింపులు జరిపినట్టు ప్రచారం జరుగుతోంది. ఇందులో ఒకరు కాంగ్రెస్లో చేరేందుకు ఓకే చెప్పారని, మరొకరు ఇంకా నిర్ణయం తీసుకోలేదని తెలుస్తోంది.
వీరి చేరికలపై ఒకట్రెండు రోజుల్లో క్లారిటీ వచ్చే చాన్సుంది. రెండు నెలల క్రితం మాజీ ఎంపీ పొంగులేటి శ్రీనివాస్ రెడ్డితో కలిసి పలువురు బీఆర్ఎస్ లీడర్లు కాంగ్రెస్లో చేరారు. పొంగులేటితో కలిసి కాంగ్రెస్లోకి వెళ్లిన భద్రాచలం నేత తెల్లం వెంకట్రావు తిరిగి సొంతగూటికి చేరి టికెట్ కూడా దక్కించుకున్నారు. భద్రాచలం నియోజకవర్గ ఇన్చార్జిగా ఉన్న తనకు తెలియకుండా వెంకట్రావ్ను తిరిగి పార్టీలో చేర్చుకోవడం.. నియోజకవర్గ ఇన్చార్జి బాధ్యతల నుంచి తనను తప్పించడాన్ని బాలసాని జీర్ణించుకోలేకపోతున్నట్టు తెలుస్తోంది.
ఇటీవల ఆయన మంత్రి హరీశ్రావును కలిసి తన ఆవేదన చెప్పుకున్నట్టు సమాచారం. మాజీ మంత్రి తుమ్మలతో బాలసానికి టీడీపీ నుంచి సన్నిహిత సంబంధాలున్నాయి. దీంతో తనతో పాటు ఆతన్ని కాంగ్రెస్లోకి తీసుకెళ్లాలని తుమ్మల ప్రయత్నిస్తున్నట్టు తెలుస్తోంది. అన్నీ అనుకున్నట్టు జరిగితే ఈనెల 16 లేదా 17న తుమ్మల వెంట బాలసాని కూడా కాంగ్రెస్ లో చేరే అవకాశముంది.
-
