- రూ.963 కోట్ల వసూలుకు అనుమతించాలని జెన్ కో ప్రతిపాదనలు
- అభ్యంతరాలు లేవనెత్తిన ఇండస్ట్రీలు, విద్యుత్ నిపుణులు
హైదరాబాద్, వెలుగు: విద్యుత్తు సంస్థలు దాఖలు చేసిన పిటిషన్లపై తెలంగాణ విద్యుత్తు నియంత్రణ మండలి (ఈఆర్సీ) బహిరంగ విచారణ చేపట్టింది. టీజీఈఆర్సీ నూతన కార్యాలయంలో చైర్మన్ తన్నీరు శ్రీరంగారావు, సభ్యులు (టెక్నికల్) ఎంఏ మనోహరరాజు, బండారు కృష్ణయ్య (ఫైనాన్స్) సోమవారం ఓపెన్ ఎంక్వైరీ నిర్వహించారు. జెన్కో ఫిక్స్‌డ్‌ చార్జీలు, ట్రూ అప్ చార్జీలపై విచారణ జరిగింది. 2022–--23 ఆర్థిక సంవత్సరానికి ట్రూ అప్ చార్జీలు, 2024-–25 నుంచి 2028--–29 కాలానికి (ఐదో నియంత్రణ కాలానికి) మల్టీ ఇయర్‌ టారిఫ్‌ పై ఎంక్వైరీ చేపట్టారు.
ఇంధన సర్దుబాటు చార్జీల కింద రూ. 963.18 కోట్ల వసూలుకు అనుమతించాలని ఈర్సీని జెన్ కో కోరింది. టీజీ జెన్ కో పిటిషన్‌పై తొలుత ఆ సంస్థ డైరెక్టర్ సచ్చిదానందమూర్తి జెన్ కో ట్రూ అప్, 5వ నియంత్రిక కాలానికి సంబంధించిన గైడ్లైన్స్ను ఆమోదించాలని కోరుతూ పవర్ పాయింట్ ప్రజెంటేషన్ ఇచ్చారు. తర్వాత పలు ఎఫ్‌టీసీసీఐ, తెలంగాణ స్పిన్నింగ్‌ మిల్స్‌ అసోసియేషన్‌, స్టీల్‌ రంగ నిపుణులు తమ అభ్యంతరాలు వ్యక్తంచేశారు. విద్యుత్ నియంత్రణ మండలి (ఈఆర్సీ) పదవీకాలం ముగింపునకు పది రోజుల ముందే అత్యంత కీలక నిర్ణయాలు తీసుకోవడానికి సిద్ధమవడంపై అనుమానం వ్యక్తంచేశారు.
ఆర్డర్లు ముందే సిద్ధం చేశారా?
ఇప్పటికే ఆర్డర్లు సిద్ధం చేసి చిన్న చితకా మార్పులతో ఇచ్చే పరిస్థితి కనిపిస్తున్నదని విద్యుత్ రంగ నిపుణులు అనుమానం వ్యక్తం చేశారు. ఈఆర్సీ చరిత్రలో ఎన్నడూ లేని విధంగా హడావుడిగా నిర్ణయాలు తీసుకుంటున్నారని, ఇవి ప్రజలపై ప్రభావం చూపుతాయని ఆందోళన వ్యక్తం చేశారు. ‘‘గత బీఆర్ఎస్ ప్రభుత్వంలో నియమించిన ఈఆర్సీ చైర్మన్ టి.శ్రీరంగారావు, సభ్యులు ఎండీ మనోహర్‌ రాజు, బండారు కృష్ణయ్య ఐదేండ్ల పదవీకాలం ఈ నెల 29తో ముగియనుంది.
దీంతో సోమవారం నుంచి శుక్రవారం వరకు వరుసగా ఐదు రోజులపాటు జెన్కో, ట్రాన్స్కో, సదరన్, నార్తర్న్ డిస్కంలు, సెస్లపై బహిరంగ విచారణ చేపడుతోంది. విద్యుత్ సంస్థలకు చెందిన 9 ప్రతిపాదనలపై 3 వారాల్లో అధ్యయనం, బహిరంగ విచారణలు, ఆర్డర్లు తయారు చేయడం సాధ్యం కాదు” అని వేణుగోపాల్రావు స్పష్టం చేశారు. విద్యుత్తు ప్లాంట్లల్లో సామర్థ్యం కంటే తక్కువగా విద్యుత్తును ఉత్పత్తి చేసి, ఓపెన్ మార్కెట్‌లో కరెంట్ కొనడంతో ప్రజలపై మోయలేని భారాన్ని మోపుతున్నారని అన్నారు.
డిస్కంలకు 18,500 కోట్లు ఎగ్గొట్టిన గత బీఆర్ఎస్ సర్కార్
గత బీఆర్ఎస్సర్కారుడిస్కంలకు రూ. 18,500 కోట్లు ఎగ్గొట్టింది. 2016–17 నుంచి 2022–23 ఆర్థిక సంవత్సరాలకు రూ.12,550 కోట్ల విద్యుత్ కొనుగోళ్లకు ఈఆర్సీ ఆమోదం తెలిపింది. ఈ మొత్తాన్ని తామే డిస్కంలకు చెల్లిస్తామని చెప్పిన గత ప్రభుత్వం.. పైసా కూడా విడుదల చేయలేదు. వినియోగదారుల నుంచి ఇంధన సర్దుబాటు చార్జీల కింద రావాల్సిన రూ.2,378 కోట్లు కూడా ఇవ్వలేదు. కొన్నేండ్లుగా ప్రభుత్వ విభాగాలకు సంబంధించిన కరెంట్ బిల్లులు చెల్లించడం లేదు. ఇలా బీఆర్ఎస్ పాలనలో ఎగ్గొట్టిన రూ.18,500 కోట్లు ఇప్పుడు విద్యుత్ సంస్థలు కొత్తగా చార్జీలు మోపే ప్రతిపాదనల్లో చేర్చడం గమనార్హం.
