హైదరాబాద్: తెలంగాణ టెక్నాలజీ సర్వీసెస్ సహకారంతో వైద్య ఆరోగ్య శాఖలో అటెండెన్స్ విధానాన్ని తీసుకొస్తున్నారు. ఇప్పటికే జిల్లాల్లో డీఎంహెచ్‌‌‌‌వో(డిస్ట్రిక్ట్ మెడికల్ అండ్ హెల్త్ ఆఫీసర్) ల ద్వారా ఉద్యోగుల ఆధార్ వివరాలను డైరెక్టర్ ఆఫ్ హెల్త్ అధికారులు సేకరిస్తున్నారు. డైరెక్టర్ఆఫ్ హెల్త్లో 860 ప్రాథమిక ఆరోగ్య కేంద్రాలు, టీవీవీపీ పరిధిలో 156, ఆయుష్ పరిధిలో 840 కేంద్రాల్లో అమలు చేయనున్నారు. ఉద్యోగి ఆధార్ నెంబర్ ఆధారంగా ఐడీని కేటాయిస్తారు. ఐడీ ద్వారా ఉద్యోగి అటెండెన్స్ వివరాలను చెక్ చేసుకోవచ్చు.
హాజరు వివరాల ఆధారంగా జీతాలు చెల్లించేలా ప్లాన్ చేస్తున్నారు. అటెండెన్స్ వివరాలను మంత్రి, డీఎంఈ, డీహెచ్, సెక్రటరీ, కలెక్టర్లు, డీఎంహెచ్‌‌‌‌వోలు లాగిన్ చేసి వివరాలను పరిశీలించే వీలు ఉండేలా యాప్ను రూపొందించారు. ఈ అటెండెన్స్విధానం ద్వారా ప్రభుత్వ ఆసుపత్రుల్లో డాక్టర్లు, సిబ్బంది సమయానికి, రెగ్యులర్గా వస్తారని భావిస్తున్నారు. దీంతో ప్రభుత్వ దవాఖానాల్లో వైద్య సేవలు మెరుగుపడుతాయని అధికారులు చెబుతున్నారు. సమయానికి డ్యూటీలకు రాని, తరచూ డుమ్మాలు కొట్టే డాక్టర్లు, సిబ్బందికి చెక్ పెట్టేందుకు రాష్ట్ర వ్యాప్తంగా ఉన్న ప్రభుత్వ దవాఖానాల్లో ఆధార్ ఆధారిత బయోమెట్రిక్ అటెండెన్స్ సిస్టమ్(అభాస్) ను తీసుకొచ్చేందకు రాష్ట్ర వైద్య, ఆరోగ్య శాఖ సిద్ధమైన సంగతి తెలిసిందే.
►ALSO READ | ఉద్యమంలో V6 పాత్ర మరువలేనిది.. తెలంగాణ మాట, పాటను ముందుకు తెచ్చింది: చెన్నూర్ ఎమ్మెల్యే వివేక్
డైరెక్టర్ ఆఫ్ హెల్త్, టీవీవీపీ(తెలంగాణ వైద్య విధాన పరిషత్), ఆయుష్ పరిధిలోని ప్రాథమిక ఆరోగ్య కేంద్రాలు మొదలు జిల్లా ఆసుపత్రుల దాకా రాష్ట్ర వ్యాప్తంగా మొత్తం 1,870 ఆసుపత్రులున్నాయి. వాటిలో పనిచేసే 35 వేల మంది వైద్య, పారామెడికల్ సిబ్బందికి ఆధార్ ఆధారిత బయోమెట్రిక్ అటెండెన్స్ పద్ధతిని తీసుకొచ్చేందుకు కసరత్తు చేస్తున్నది. మొదట డైరెక్టర్ ఆఫ్ హెల్త్ పరిధిలో వచ్చే ఆసుపత్రుల్లో ఈ అటెండెన్స్ విధానాన్ని తీసుకురావాలని చూస్తుంది. ఆ తరువాత వైద్య విధాన పరిషత్తు, డైరెక్టర్ ఆఫ్ మెడికల్ ఎడ్యుకేషన్ పరిధిలోని ఆసుపత్రుల్లో అమలు చేయనున్నారు.
