- మండలానికో ఎంఈవో.. సర్కారు ఉత్తర్వులు
- 609 మండలాలకు ఇన్చార్జీలుగా సీనియర్ హెచ్ఎంలు
- ఒక్కరికే ఒక్కో మండలం బాధ్యతలు ఇవ్వడం ఇదే తొలిసారి
హైదరాబాద్, వెలుగు: రాష్ట్ర ప్రభుత్వం విద్యాశాఖలో మరో కీలక నిర్ణయం తీసుకున్నది. స్కూళ్లపై మరింత పర్యవేక్షణ పెంచేందుకు గానూ ప్రతి మండలానికి ఒక మండల విద్యాశాఖ అధికారి (ఎంఈవో) ఉండేలా చర్యలు తీసుకున్నది. మండలాల్లోని సీనియర్ హెడ్మాస్టర్లకు ఇన్చార్జి బాధ్యతలు అప్పగిస్తూ స్కూల్ ఎడ్యుకేషన్ డైరెక్టర్ నర్సింహారెడ్డి మంగళవారం ఉత్తర్వులు జారీచేశారు. రాష్ట్రంలో 632 మండలాలు ఉండగా, వాటిలో 16 మండలాల్లోనే రెగ్యులర్ ఎంఈవోలు ఉన్నారు.
ఇటీవల ప్రభుత్వం టీచర్లకు బదిలీలు, ప్రమోషన్ల ప్రక్రియ నిర్ణయించింది. దీంతో ఇన్చార్జి ఎంఈవోలుగా ఉన్న చాలామంది హెడ్మాస్టర్లు.. ఇతర ప్రాంతాలకు బదిలీ అయ్యారు. ఈ నేపథ్యంలో ప్రభుత్వం స్కూళ్లపై మరింత పర్యవేక్షణ పెంచేందుకు మండలానికి ఒకరినే ఇన్చార్జి ఎంఈవోగా నియమించాలని నిర్ణయం తీసుకున్నది. దీనికి తగ్గట్టుగానే 609 మండలాలకు ఇన్చార్జీలతోపాటు 16 మండలాలకు రెగ్యులర్ ఎంఈవోలకు బాధ్యతలు అప్పగించింది.
ఇప్పటివరకూ ఒక్కో ఇన్చార్జి ఎంఈవోకు 4 నుంచి 10 మండలాల బాధ్యతలు ఇచ్చేవారు. దీంతో ఆయా మండలాల్లోని స్కూళ్లపై పర్యవేక్షణ కొరవడింది. రెగ్యులర్ ఎంఈవోలకు 19 ఏండ్ల తర్వాత బదిలీలు చేపట్టారు. కాగా, మరో ఏడు కొత్త మండలాలు ఐఎఫ్ఎంఐఎస్ వెబ్ సైట్లో అప్డేట్ కాలేదు. దీంతో ఆయా మండలాల నియామకం పెండింగ్ లో పెట్టారు. కాగా, సర్కారు తీసుకున్న నిర్ణయాన్ని హెడ్మాస్టర్ల సంఘం రాష్ట్ర అధ్యక్ష, ప్రధాన కార్యదర్శులు రాజభాను చంద్రప్రకాశ్, రాజగంగారెడ్డి, టీఆర్టీఎఫ్ రాష్ట్ర అధ్యక్ష, ప్రధాన కార్యదర్శులు కటకం రమేశ్, మారెడ్డి అంజిరెడ్డి స్వాగతించారు.
సీఎం రేవంత్ రెడ్డికి కృతజ్ఞతలు చెప్పారు. ఇదిలా ఉండగా, స్కూల్ ఎడ్యుకేషన్ డైరెక్టర్ ఇచ్చిన ఉత్తర్వులు కోర్టు ధిక్కరణ కిందికి వస్తుందని లోకల్ కేడర్ గవర్నమెంట్ టీచర్స్ అసిసోసియేషన్ రాష్ట్ర అధ్యక్షుడు వీరాచారి అన్నారు.
