సాగుకు పనికిరాని భూములపై సర్వే

• గ్రామాల వారీగా ఫీల్డ్​ వెరిఫికేషన్​
• రంగంలోకి ప్రత్యేక బృందాలు
• 4 రోజుల పాటు ఫీల్డ్​ ఎంక్వైరీ

హైదరాబాద్, వెలుగు: రాష్ట్ర వ్యాప్తంగా సాగుకు పనికిరాని భూములపై సర్వే షురూ అయింది. ప్రత్యేక బృందాలు రంగంలోకి దిగి లెక్కలు తీస్తున్నాయి. రెవెన్యూ డిపార్ట్​మెంట్​ఇచ్చిన డేటాతో గ్రామాల్లో ఫీల్డ్​వెరిఫికేషన్​ బృందాలు సర్వే చేస్తున్నాయి. అగ్రికల్చర్, రెవెన్యూ, పంచాయతీరాజ్ అధికారులు గ్రామాల్లో పర్యటిస్తూ.. సాగుకు పనికిరాని భూముల గుర్తింపు ప్రక్రియ చేపడుతున్నారు. పంచాయతీ సెక్రటరీ, ఏవోలు, ఆర్​ఐలు ఫీల్డ్​ వెరిఫికేషన్ టీమ్​లతో సర్వే చేపట్టారు. ఈ ఫీల్డ్ ​సర్వే గురువారం షురూ కాగా.. ఈ నెల 19 వరకు కొనసాగుతుంది.

 ఈ​ టీమ్​లు విలేజ్​లో ఎక్కడెక్కడ నాన్​ అగ్రికల్చర్​ ల్యాండ్స్​ ఉన్నాయో గుర్తిస్తాయి. ప్రతి గ్రామంలో ఏఈవో, రెవెన్యూ ఇన్​స్పెక్టర్లు, పంచాయతీరాజ్ అధికారులు​ బృందంగా ఈ సర్వే చేస్తున్నారు. ఇప్పటికే వివరాలున్న రెవెన్యూ డేటా ఆధారంగా గ్రామాల్లో భూముల జాబితాను సిద్ధం చేస్తున్నారు.

గ్రామ సభల్లో భూముల జాబితా పదర్శన..

సర్వే నంబర్ల వారీగా సాగుకు పనికిరాని భూముల వివరాలతో ప్రత్యేక జాబితా రూపొందించి.. ఆ లిస్ట్​ను గ్రామ సభల్లో ప్రదర్శిస్తారు. ఈ నెల 20 నుంచి 23 వరకు ఈ లిస్ట్​లో ఉన్న భూముల వివరాలను చదివి వినిపించి, చర్చిస్తారు.  అనంతరం ఈ లిస్ట్​ను ఆమోదంలోకి తీసుకుంటారు. అభ్యంతరాలుంటే వాటిని పరిశీలిస్తారు. ఆ భూములను పోర్టల్లో సంబంధిత అధికారి నమోదు చేస్తారు. 25న ఈ జాబితాలను జిల్లాల వారీగా ప్రభుత్వానికి పంపిస్తారు. వాటి ఆధారంగా వ్యవసాయ యోగ్యం కాని భూములను రైతు భరోసా నుంచి తొలగించి.. మిగిలిన భూముల జాబితా ఆధారంగా పట్టాదారులకు రైతుభరోసా సాయం ఈ నెల 26న విడుదల చేస్తుంది.

ఒక్కో గ్రామంలో  50 ఎకరాలకు పైనే..

గ్రామాల వారీగా సాగుకు పనికిరాని రాళ్లు, రప్పలతో గుట్టలు, గ్రానైడ్​ క్వారీల్లో, రియల్​ ఎస్టేట్​ వెంచర్లలో ఉన్న భూముల లెక్కలు తీస్తున్నారు. ఇలా యావరేజీగా గ్రామానికి 50 ఎకరాలకు పైనే ఇలాంటి భూములు ఉన్నాయని అధికారులు చెబుతున్నారు. పట్టణ ప్రాంతాలకు సమీపంలో ఉన్న గ్రామాల్లో ఈ భూములు ఎక్కువగా నమోదవుతున్నాయని ఫీల్డ్​కు వెళ్లిన అధికారులు చెప్తున్నారు. ప్రధానంగా రియల్​ ఎస్టేట్​ వెంచర్లు, గుట్టలు, గ్రానైట్​క్వారీలున్న ప్రాంతాల్లో వంద ఎకరాలకు పైగా ఇలాంటి నాన్​ అగ్రికల్చర్​ ల్యాండ్స్​ బయట పడుతున్నాయని పేర్కొంటున్నారు.