- సీఎంఆర్ బకాయిలపై ప్రభుత్వం సీరియస్
- ఎనిమిది మిల్లులపై రెవెన్యూ రికవరీ యాక్ట్
- రెండు మిల్లులపై క్రిమినల్ కేసులు.. మిల్లర్ అరెస్ట్
- డీఫాల్ట్ లిస్టులో 39 మిల్లులు
మంచిర్యాల, వెలుగు: ప్రభుత్వం కస్టమ్ మిల్లింగ్ కోసం ఇచ్చిన వడ్లను పెద్ద మొత్తంలో పక్కదారి పట్టించి కొందరు రైస్ మిల్లర్లు కోట్లకు పడగలెత్తారు. సీఎంఆర్ బకాయిలపై గవర్నమెంట్ సీరియస్గా ఉండడంతో సివిల్ సప్లయి అధికారులు ఇటీవల మిల్లుల లెక్కలు తీశారు. కేవలం ఎనిమిది మందే రూ.62 కోట్లు సర్కారుకు బకాయిపడ్డట్టు తేల్చారు. జిల్లాలో రా, బాయిల్డ్ మిల్లులు 54 ఉండగా, వీటిలో 39 మిల్లులు డీఫాల్ట్ లిస్టులో చేరాయి. ఈ మిల్లర్లు ఎవరెంత తిన్నారో లెక్కలు తీస్తే రూ.100 కోట్లు దాటిపోయే అవకాశం కనిపిస్తోంది.
సర్కారు ధాన్యంతో దందా..
ప్రభుత్వం కొనుగోలు కేంద్రాల ద్వారా రైతుల నుంచి సేకరించిన వడ్లను సీఎంఆర్ కోసం రైస్ మిల్లర్లకు అప్పగిస్తుంది. ఈ వడ్లను మిల్లింగ్ చేసి క్వింటాలుకు 67 కిలోల బియ్యాన్ని సీఎంఆర్ కింద ఇవ్వాల్సి ఉంటుంది. గత సర్కారు మిల్లర్ల నుంచి ఎలాంటి సెక్యూరిటీ డిపాజిట్లు తీసుకోకుండానే రూ. కోట్ల విలువైన వడ్లను అప్పజెప్పింది. కొందరు మిల్లర్లు ఈ వడ్లను అమ్ముకోగా, మరికొందరు వడ్లను మిల్లింగ్ చేసి బియ్యాన్ని అమ్ముకున్నారు.
ఇలా ఒక్కో మిల్లర్ రెండు మూడు సీజన్ల సీఎంఆర్ ఎగ్గొట్టి కోట్లు కూడబెట్టుకున్నారు. రేషన్ బియ్యాన్ని రీసైక్లింగ్ చేసి అరకొరగా సీఎంఆర్ డెలివరీ చేశారు. కొందరు అధికారులు మిల్లర్లతో మిలాఖత్ అయి ‘మామూలు’గా తీసుకోవడం, ప్రభుత్వం పదేపదే గడువులు పొడిగించడం వారికి వరంగా మారింది. 2019–-20 యాసంగి నుంచి 2022–-23 యాసంగి సీజన్లకు సంబంధించి 9 వేల మెట్రిక్ టన్నుల సీఎంఆర్ పెండింగ్ ఉంది. దీంతో అధికారులు 39 మిల్లులను డీఫాల్ట్ లిస్టులో చేర్చారు.
క్రిమినల్ కేసులు... మిల్లర్ అరెస్ట్
డీఫాల్ట్ లిస్టులో ఉన్న 39 మిల్లుల్లో మొండి బకాయిదారులైన 17 మిల్లులపై రెవెన్యూ రికవరీ (ఆర్ఆర్) యాక్ట్ ప్రయోగించి ఆస్తులు జప్తు చేయాలని సివిల్ సప్లయిస్ అధికారులు నిర్ణయానికి వచ్చారు. ఇందులో భాగంగా ఇటీవల ఎనిమిది మిల్లులపై ఆర్ఆర్ యాక్ట్ ప్రయోగించారు. మాతేశ్వరి ఆగ్రో ఇండస్ర్టీస్ (లక్ష్మీపూర్), దుర్గా ఇండస్ర్టీస్ (నర్సింగాపూర్)పై ఆర్ఆర్ యాక్ట్తో పాటు క్రిమినల్ కేసులు నమోదు చేశారు. వీటి యజమాని దర్శనాల రమేశ్ను బెల్లంపల్లి పోలీసులు అరెస్టు చేశారు. ఈ రెండు మిల్లులు రూ.17 కోట్ల విలువైన సీఎంఆర్ బకాయి పడ్డట్టు అధికారులు తెలిపారు.
మిగతా మిల్లులపై కూడా క్రిమినల్ కేసులు పెడుతామని సివిల్ సప్లయిస్ అధికారులు పేర్కొంటున్నారు. అత్యధికంగా బకాయిలు ఉన్న మిల్లుల వివరాలకొస్తే అన్నపూర్ణ ఆగ్రో మోడ్రన్ రైస్ మిల్ (కుందారం) - రూ.3 కోట్లు, వాసవీమాత ఆగ్రో ఇండస్ర్టీస్ (రేచిని) - రూ.4 కోట్లు, బీఎస్వై రా రైస్మిల్ (ముదిగుంట) - రూ.19 కోట్లు, శ్రీవెంకటరమణ ఆగ్రో ఇండస్ర్టీస్ (కోటపల్లి) - రూ.9 కోట్లు, శ్రీలక్ష్మీనర్సింహా మోడ్రన్ రైస్మిల్ (కలమడుగు) - రూ.3 కోట్లు, జై యోగేశ్వర ఇండస్ర్టీస్ (కొత్తూర్) - రూ.7 కోట్లు, మాతేశ్వరి ఆగ్రో ఇండస్ర్టీస్ (లక్ష్మీపూర్) - రూ.7 కోట్లు, దుర్గా ఇండస్ర్టీస్ (నర్సింగాపూర్) - రూ.10 కోట్లు ఉన్నాయి. వీటిపై రెవెన్యూ రివకరీ యాక్ట్ ప్రయోగించారు.
జిల్లాలో సీఎంఆర్ బకాయిల వివరాలు (మెట్రిక్ టన్నుల్లో)
సంవత్సరం సీజన్ పెండింగ్
2019- 20 యాసంగి 6,76.21 2021-22 వానాకాలం 3,386.48 2021-22 యాసంగి 3,019.20 2022-23 వానాకాలం 2,026.51
