- హైడ్రాపై ఆర్డినెన్స్!
- చట్టబద్ధత కల్పించేందుకు రాష్ట్ర ప్రభుత్వం రెడీ
- ఈ నెల 20న కేబినెట్ భేటీలో నిర్ణయం
- ఆర్ఓఆర్--2024కు కూడా ఆర్డినెన్స్
- రేషన్ కార్డులు, హెల్త్ ప్రొఫైల్ కార్డుల పంపిణీపై చర్చ
- కులగణన, రైతు భరోసా గైడ్లైన్స్ విడుదల చేసే చాన్స్
- 200 కొత్త పంచాయతీల ఏర్పాటుకూ ఆమోదం?
హైదరాబాద్, వెలుగు: కబ్జాలపై ఉక్కుపాదం మోపుతున్న హైడ్రాకు చట్టబద్ధత కల్పించేందుకు రాష్ట్ర ప్రభుత్వం సిద్ధమవుతున్నది. హైడ్రా ఇప్పటి వరకు జీవో 99 ద్వారా మాత్రమే కొనసాగుతున్నది. హైడ్రా చేపడ్తున్న అక్రమ నిర్మాణాల కూల్చివేతలపై కోర్టుల్లో కొందరు కేసులు వేశారు. దీంతో భవిష్యత్లోనూ ఎలాంటి ఇబ్బందులు రాకుండా చట్టబద్ధత కల్పించడానికి ఆర్డినెన్స్ తేవాలని ప్రభుత్వం భావిస్తున్నది. కేబినెట్ భేటీలో దీనిపై నిర్ణయం తీసుకునే అవకాశం ఉంది.
ఈ నెల 20న సాయంత్రం 4 గంటలకు సెక్రటేరియెట్లో సీఎం రేవంత్ రెడ్డి అధ్యక్షతన మంత్రివర్గం సమావేశం జరగనుంది. ఇందులో హైడ్రాతోపాటు పలు కీలక అంశాలపై చర్చించనున్నారు. ప్రభుత్వ ఆస్తులు, వారసత్వ సంపదను రక్షించేందుకు రెండున్నర నెలల కింద హైడ్రాను ప్రభుత్వం ఏర్పాటు చేసినప్పటి నుంచి కబ్జాలపై ముఖ్యంగా ఎఫ్టీఎల్, బఫర్జోన్లలో కట్టిన అక్రమ నిర్మాణాలపై పెద్ద ఎత్తున ఫిర్యాదులు వస్తున్నాయి. హైడ్రా కూడా అంతే వేగంగా కబ్జాల నుంచి ప్రభుత్వ భూములను విడిపిస్తున్నది.హైదరాబాద్ పరిసరాల్లోని చెరువులను ఆక్రమించి నిర్మించిన అక్రమ కట్టడాలను కూల్చివేస్తున్నది. ఎన్ కన్వెన్షన్ సహా పలు కబ్జాలను నేలమట్టం చేసింది. అయితే.. హైడ్రాకు చట్టబద్ధత లేదని, దాని చర్యలు కరెక్ట్ కావంటూ కొందరు ఇటీవల కోర్టులను ఆశ్రయిస్తున్నారు. ఈ నేపథ్యంలో ముందుముందు ఎలాంటి లీగల్ ఇష్యూస్ రాకుండా హైడ్రాకు చట్టబద్ధత కల్పించాలని ప్రభుత్వం భావిస్తున్నది. ఇందులో భాగంగానే ఈ నెల 20 కేబినెట్లో ఆర్డినెన్స్ తీసుకురావడంపై కీలకనిర్ణయం తీసుకునే అవకాశం ఉంది.
రైతుభరోసా, రేషన్ కార్డులపైనా..!
కేబినెట్ భేటీలో హైడ్రాతోపాటు ఆర్ఓఆర్, బీసీ కులగణన, రైతు భరోసా అంశాలపైనా చర్చించనున్నారు. రికార్డ్స్ ఆఫ్ రైట్స్ (ఆర్ఓఆర్–2024)ను చట్టంగా తెచ్చేందుకు కేబినెట్లో ఆమోదం తెలిపే అవకాశం ఉంది. ఆర్ఓఆర్పై నెల రోజుల పాటు ప్రజల నుంచి సలహాలు, సూచనలను ప్రభుత్వం స్వీకరించింది. దీనిపైనా చర్చించి కేబినెట్ ఆమోదం తీసుకునే అవకాశం ఉంది.
కులగణనపై ఎలా ముందుకు వెళ్లాలనే దానిపైనా మంత్రివర్గ సమావేశంలో చర్చించనున్నారు. రైతులకు పెట్టుబడి సాయం కింద ఎకరాకు ఏడాదికి రూ.15 వేలు ఇచ్చే రైతుభరోసా స్కీమ్పై కేబినెట్ సమావేశంలో డిస్కస్ చేసే చాన్స్ ఉంది. వానాకాలం సీజన్ ప్రారంభం కావడంతో దసరా నుంచి రైతుభరోసా నిధులు పంపిణీ చేయాలని ప్రభుత్వం భావిస్తున్నది. విధివిధానాల కోసం ఇప్పటికే కేబినెట్ సబ్ కమిటీ అన్ని జిల్లాల్లో పర్యటించి సలహాలు, సూచనలను తీసుకున్నది. వాటి ఖరారుకు కేబినెట్ భేటీలో ఆమోదం తీసుకోనున్నట్లు తెలిసింది.
ఇటీవల సంభవించిన భారీ వర్షాలు, వరదలు రాష్ట్రంలోని పలు ప్రాంతాలను దెబ్బతీశాయి. ఆ వరదల వల్ల జరిగిన నష్టాన్ని కేంద్ర ప్రభుత్వం దృష్టికి తీసుకెళ్లడానికి, సాయం కోరుతూ కేబినెట్ భేటీలో తీర్మానం చేయనున్నారు.
కొత్తగా మరో 200 గ్రామ పంచాయతీల ఏర్పాటుకు కేబినెట్ సమావేశంలో ఆమోదం తీసుకోనున్నారు.
ఈ నెల 17 నుంచి గ్రామాల్లో ప్రజాపాలన శిబిరాలు ఏర్పాటు చేసి కొత్త రేషన్ కార్డులు, హెల్త్ ప్రొఫైల్ కార్డుల ప్రాసెస్ చేపట్టాలని ప్రభుత్వం ముందుగా నిర్ణయించింది. అయితే ఇప్పుడు ఆ రోజు ప్రజాపాలన దినోత్సవం, వినాయక నిమజ్జనం వంటి కార్యక్రమాలు ఉన్నాయి. దీంతో ప్రజాపాలన శిబిరాలను ఎప్పటి నుంచి చేపట్టాలని.. కొత్త రేషన్ కార్డులు, హెల్త్ ప్రొఫైల్ కార్డుల పంపిణీకి ఎలాంటి విధివిధానాలు ఖరారు చేయాలనే దానిపై కేబనెట్లో చర్చించనున్నారు.
