ములుగు/ తాడ్వాయి, వెలుగు : రాష్ర్ట గవర్నర్ జిష్ణుదేవ్ వర్మ మంగళవారం ములుగు జిల్లాలో పర్యటించనున్నారు. దత్తత గ్రామమైన తాడ్వాయి మండలం కొండపర్తిలో పర్యటించి చేపట్టిన అభివృద్ధి పనులను పరిశీలించి గ్రామస్తులతో ఇంటరాక్ట్ కానున్నారు. కొమరం భీమ్, బిర్సాముండా విగ్రహాలను ఆవిష్కరించనున్నారు. ఈ మేరకు సోమవారం కలెక్టర్ దివాకర కలెక్టరేట్ లో అడిషనల్ కలెక్టర్ మహేందర్ జీ, సంపత్ రావు, డీఎస్పీ రవీందర్తో కలిసి జిల్లా అధికారులతో ప్రత్యేకంగా సమావేశమయ్యారు.
గవర్నర్ పర్యటనకు పకడ్బందీ ఏర్పాట్లు చేయాలని ఆదేశించారు. గవర్నర్ కొండపర్తి పర్యటన అనంతరం మేడారం సమ్మక్క సారలమ్మను దర్శించుకుంటారని తెలిపారు. కార్యక్రమంలో ఆర్డీవో వెంకటేశ్, అన్ని శాఖల జిల్లా అధికారులు, ములుగు, తాడ్వాయి మండలాల ఎంపీడీవోలు, తహసీల్దార్లు, ఎంపీవోలు తదితరులు పాల్గొన్నారు.
