- కేంద్రానికి ప్రతిపాదనలు పంపనున్న రాష్ట్ర ప్రభుత్వం
- కరీంనగర్ - కామారెడ్డి - ఎల్లారెడ్డి ( కేకేవై) స్టేట్హైవేను నేషనల్హైవేగా మార్చాలని వినతి
- మహారాష్ట్ర, కర్నాటక వాసులకూ రవాణా సదుపాయం
కామారెడ్డి జిల్లా మీదుగా మరో హైవే నిర్మాణానికి రాష్ట్ర ప్రభుత్వం ప్రతిపాదనలు సిద్ధం చేస్తోంది. కరీంనగర్ - కామారెడ్డి - ఎల్లారెడ్డి ( కేకేవై) స్టేట్హైవేను నేషనల్హైవేగా మార్చాలని రాష్ర్ట ప్రభుత్వం కేంద్రానికి ప్రపోజల్ పంపనుంది. ఈ హైవే నిర్మాణంతో కామారెడ్డి, సిరిసిల్లా, కరీంనగర్ జిల్లాలతో పాటు మహారాష్ర్ట, కర్నాటక రాష్ట్రాలకు రవాణా మెరుగుపడనుంది. ఇప్పటికే కామారెడ్డి జిల్లా మీదుగా 2 హైవేలు వెళ్తుండగా మరో హైవే నిర్మాణానికి ప్రపోజల్ పంపనున్నారు. కేకేవై రోడ్డును హైవేగా మార్చడం ద్వారా కరీంనగర్, సిరిసిల్ల, కామారెడ్డి జిల్లాల మధ్య రవాణా వ్యవస్థ మరింత మెరుగుకావటంతో పాటు మహారాష్ర్టలోని పలు ఏరియాలకు అనుసంధానం కానుంది.
కామారెడ్డి, వెలుగు: కరీంనగర్, కామారెడ్డి, ఎల్లారెడ్డి స్టేట్ హైవేను కలుపుతూ పలు ఏరియాలకు రవాణా సదుపాయం ఉంది. నిత్యం ఈ రోడ్డు బస్సులు, కార్లు, ఆటోలు, బైక్లు, లారీలు, ఇతర గూడ్స్ వెహికల్స్రాకపోకలతో రద్దీగా ఉంటుంది. కామారెడ్డి, నిజామాబాద్, మెదక్ జిల్లాల్లోని పలు ఏరియాల నుంచి ఈ మార్గం గుండా సిరిసిల్లా, కరీంనగర్తో పాటు మహారాష్ర్ట, కర్నాటక వాసులు వేములవాడ రాజరాజేశ్వర స్వామి , కొండగట్టు అంజన్న దర్శనానికి వస్తుంటారు. 2 లేన్లతో ఉన్న ఈ రోడ్డుపై వాహనాల రాకపోకలతో నిత్యం రద్దీగా ఉంటుంది.
జంక్షన్లు లేకపోవడంతోపాటు రోడ్డు ఇరుకు ఉండటం, మూల మలుపులు, గుంతలు పడి ఉండడంతో ప్రమాదాలు కూడా జరుగుతుంటాయి. కేకేవై రోడ్డును నేషనల్ హైవేగా మార్చి అభివృద్ధి చేస్తే రవాణా మెరుగవడం, రాకపోకలకు సమయం తగ్గడంతోపాటు ప్రమాదాలు కూడా తగ్గేందుకు అవకాశం ఉంటుంది. కేకేవై రోడ్డును హైవేగా మర్చాలని కొద్ది రోజుల క్రితం ఆర్అండ్బీ శాఖ మంత్రి కోమటిరెడ్డి వెంకటరెడ్డికి ఎల్లారెడ్డి ఎమ్మెల్యే కె.మదన్మోహన్రావు విజ్ఞప్తి చేశారు.
ALSO READ : రేషన్ బియ్యం దందాలో 11 మంది పోలీసులు
పలు స్టేట్హైవేలను నేషనల్ హైవేలుగా మార్చి అభివృద్ధి చేయాలని కేంద్రానికి పంపేందుకు రాష్ట్ర ప్రభుత్వం ప్రపోజల్స్ సిద్ధం చేసింది. ఇందులో కేకేవై రోడ్డు కూడా ఉంది. కరీంనగర్ నుంచి సిరిసిల్ల, కామారెడ్డి, ఎల్లారెడ్డి మీదుగా పిట్లం ( ఎన్హెచ్–161 నర్సింగ్రావు పల్లి చౌరస్తా వరకు) 165 కి.మీ. హైవేగా మార్చనున్నారు.
మూడు హైవేలను కలుపుతూ...
జిల్లాలో ఉన్న మూడు హైవేలను కలుపుతూ కేకేవై రోడ్డు నిర్మాణం జరగనుంది. కశ్మీర్ నుంచి కన్యాకుమారి వరకు ఉన్న ఎన్హెచ్ 44, సంగారెడ్డి నుంచి నాందేడ్– అకోల వరకు ఉన్న ఎన్హెచ్ 161, హైదరాబాద్, నర్సాపూర్, మెదక్, ఎల్లారెడ్డి, బాన్సువాడల మీదుగా నిర్మిస్తున్న హైవేను అనుసంధానం చేయనుంది. హైదరాబాద్ నుంచి నర్సాపూర్, మెదక్ వరకు హైవే నిర్మాణం పూర్తికాగా, ఇక్కడి నుంచి ఎల్లారెడ్డి, బాన్సువాడ, వర్ని వరకు నిర్మాణ పనులు కొనసాగుతున్నాయి.
మహారాష్ర్టలోని నాందేడ్, అకోల, కర్నాటకలోని బీదర్ ఏరియాల నుంచి వచ్చే వాహనాలు కామారెడ్డి, సిరిసిల్ల, కరీంనగర్ జిల్లాల వెళ్లడం సులభతరం కానుంది. మెరుగైన రవాణా వసతులు ఉంటే ఇండస్ర్టీస్ ఏర్పాటుతో పాటు, ఉపాధి అవకాశాలు పెరుగుతాయి. వ్యవసాయ ఉత్పత్తులను ఆయా జిల్లాలకు తీసుకెళ్లి ఎక్కువ ధరలకు అమ్ముకోవటానికి వీలుంటుంది. స్టేట్నుంచి కేంద్రానికి ప్రపోజల్స్వెళ్లిన తర్వాత త్వరగా మంజూరు కావటానికి ప్రజాప్రతినిధులు చొరవ చూపాల్సిన
అవసరముంది.
