- దేశ సేవ చేసినవారితో ఇలాగే ప్రవర్తిస్తారా
- రాష్ట్ర సర్కార్పై హైకోర్టు ఫైర్
- స్టేటస్కో కొనసాగించాలని ఆదేశం
హైదరాబాద్, వెలుగు : ఇండియన్ ఎయిర్ ఫోర్స్లో పనిచేసి రిటైర్ అయిన సైనికుడి భూమిని డంపింగ్ యార్డ్ కు కేటాయించడం ఏంటని ప్రభుత్వంపై హైకోర్టు మండిపడింది. దేశానికి సేవలందించిన ఓ సైనికుడి కుటుంబంతో ఇలాగే ప్రవర్తిస్తారా? అని నిలదీసింది. ఇది ఏమాత్రం సరికాదని ఫైర్ అయింది. భూమి విషయంలో స్టేటస్కో కొనసాగించాలని ఆదేశించింది. దీనిపై కౌంటర్ దాఖలు చేయాలని అధికారులను ఆదేశించింది.
హైదరాబాద్కు చెందిన వీజీ విఠల్, ఇండియన్ ఎయిర్ఫోర్స్లో పని చేశారు. 1962లో చైనా, 1971లో పాకిస్తాన్తో జరిగిన వార్లో పాల్గొన్నారు. దేశ సేవలో అత్యుత్తమ ప్రతిభ కనబర్చిన విఠల్కు కేంద్ర ప్రభుత్వం ఏడు ప్రతిభా పురస్కారాలతో సన్మానించింది. విఠల్ సేవలకు గుర్తింపుగా 1974లో యాదగిరిగుట్ట మండలం మల్లాపురంలోని సర్వే నెంబర్ 64/1లో 5 ఎకరాల భూమిని ప్రభుత్వం కేటాయించింది.
2003లో విఠల్ చనిపోవడంతో ఆ భూమిని ఆయన భార్య వి.అరుణాబాయి పేరుతో రెవెన్యూ రికార్డుల్లో చేర్చారు. భూమి ఆమె ఆధీనంలోనే ఉంది. 2022, డిసెంబర్లో ఈ భూమిలో 2 ఎకరాలను డంపింగ్ యార్డ్కు కేటాయిస్తూ యాదాద్రి భువనగిరి జిల్లా కలెక్టర్ ఉత్తర్వులు జారీ చేశారు. దీన్ని అరుణాబాయి హైకోర్టులో సవాల్ చేశారు. విచారించిన హైకోర్టు జడ్జి జస్టిస్‌ బి.విజయసేన్‌‌‌‌రెడ్డి.. దేశానికి సేవలు అందించిన సైనికుడి విషయంలో ఇలా చేయడం తగదని మండిపడ్డారు.
ALSO READ:బస్సులను,కార్లను నమ్ముకుంటే ఇల్లు చేరలేరు.. వచ్చేయండి సార్..!!
మాజీ సైనికుడి కుటుంబం విషయంలో ప్రభుత్వ తీరు ఎంతమాత్రం సమర్థనీయం కాదన్నారు. భూమి విషయంలో స్టేటస్కో అమలు చేయాలని సూచించారు. కౌంటర్ దాఖలు చేయాలంటూ ఆ జిల్లా కలెక్టర్, రెవెన్యూ అధికారులను ఆదేశించారు. విచారణను ఆగస్టు 23కి వాయిదా వేస్తున్నట్లు ప్రకటించారు.
