ఏపీ మాజీ సీఎం, వైసీపీ అధినేత వైఎస్ జగన్ కేసుల విషయంలో తెలంగాణ హైకోర్టులో కీలక పరిణామం చోటు చేసుకుంది. సీబీఐ కోర్టులో ఉన్న జగన్ కేసులపై విచారణ వేగవంతం చేయాలని హరిరామజోగయ్య పిటిషన్ దాఖలు చేసిన సంగతి తెలిసిందే. ఈ పిటీషన్ పై విహరణ జరిపిన హైకోర్టు సీబీఐకి కీలక ఆదేశాలు జారీ చేసింది. జగన్ కేసులకు సంబంధించి పూర్తి నివేదిక సమర్పించాలని సీబీఐని ఆదేశించింది హైకోర్టు.
ఈ అంశంపై కౌంటర్ దాఖలు చేయాలని జగన్ తరపు న్యాయవాదికి ఆదేశాలు జారీ చేసింది కోర్టు. ఈ పిటిషన్ పై తదుపరి విచారణ జూలై 23కు వాయిదా వేసింది తెలంగాణ హైకోర్టు. 2019 ఎన్నికల ముందు వరకు ఈ కేసుల్లో విచారణకు హాజరైన జగన్, ఆ తర్వాత ఏపీ సీఎంగా బాధ్యతలు చేపట్టాక కోర్టుకు హాజరయ్యే విషయంలో మినహాయింపు కోరిన సంగతి తెలిసిందే. ఇప్పుడు సీఎం పదవి కోల్పోయిన నేపథ్యంలో జగన్ కోర్టుకు హాజరవుతారా లేదా అన్నది ఆసక్తిగా మారింది.
