- 200 ఎకరాల్లో ఏఐ సిటీ అభివృద్ధి చేస్తం: మంత్రి శ్రీధర్ బాబు
- ‘ఏఐ తెలంగాణ’ లక్ష్యాల సాధనకు కంపెనీలతో 26 ఒప్పందాలు
- ఇవి రాష్ట్రాన్ని దేశంలోనే బలమైన ఏఐ శక్తిగా మారుస్తయ్
- తప్పుడు సమాచారం, డీప్ ఫేక్స్ కట్టడికి చర్యలు తీసుకుంటామని వెల్లడి
హైదరాబాద్, వెలుగు:ఆర్టిఫిషియల్ ఇంటెలిజెన్స్ విప్లవంలో తెలంగాణ ముందంజలో ఉందని ఐటీ, ఇండస్ట్రీస్ శాఖ మంత్రి శ్రీధర్ బాబు అన్నారు. ఈ విప్లవంలో తెలంగాణ భాగమవడమే కాదు.. ముందుండి నడిపిస్తున్నదని ఆయన చెప్పారు. ఏఐ స్ట్రాటజీకి కేంద్ర బిందువైన హైదరాబాద్లో 200 ఎకరాల్లో ఏఐ సిటీని అభివృద్ధి చేసేందుకు ఇటీవలే నిర్ణయించామని గుర్తుచేశారు. ఏఐ రీసెర్చ్, అభివృద్ధికి ఈ ఏఐ సిటీ డెస్టినేషన్గా ఉంటుందన్నారు. నూతన ఆవిష్కరణలకు ఏఐ సిటీ పుట్టినిల్లవుతుందని పేర్కొన్నారు. ప్రపంచానికి ఏఐలో తెలంగాణను చుక్కానిగా నిలిపేందుకు ఈ ఏఐ సిటీ దోహదపడుతుందన్నారు.
అత్యాధునిక కంప్యూటింగ్ ఫెసిలిటీలు, విస్తృతమైన డేటా సెంటర్లు, సుస్థిరమైన కనెక్టివిటీ వంటి వాటిని ఏఐ సిటీ అందిస్తుందని పేర్కొన్నారు. ‘‘ఏఐ సిటీలో స్కూల్ ఆఫ్ ఎక్సలెన్స్ ప్రారంభించేందుకు మేం ప్రణాళికలను సిద్ధం చేశాం. ఏఐ సిటీ నిర్మాణం పూర్తయ్యేలోపు శంషాబాద్లో 2 లక్షల చదరపుటడుగుల విస్తీర్ణంతో అన్ని సౌకర్యాలతో కూడిన ఆఫీసు స్థలాలను ఏఐ కంపెనీలకు అందిస్తాం. ఏఐ సిటీ నిర్మాణం జరుగుతున్నప్పుడే కంపెనీలు తమ కార్యకలాపాలను ప్రారంభించే అవకాశం ఉంటుంది” అని వివరించారు.
గురువారం ఏఐ గ్లోబల్ సమిట్లో మంత్రి శ్రీధర్బాబు మాట్లాడుతూ.. ‘ఏఐ తెలంగాణ’ కింద పేర్కొన్న లక్ష్యాలను సాధించేందుకు ప్రైవేటు సంస్థలు, విద్యాసంస్థలు, టెక్ కంపెనీలు, స్టార్టప్లు, ఎన్జీవోలతో కలిసి 26 ఎంవోయూలను రాష్ట్ర ప్రభుత్వం కుదుర్చుకున్నదని వెల్లడించారు. ఇవి రాష్ట్రాన్ని దేశంలోనే బలమైన ఏఐ శక్తిగా మార్చేందుకు ఉపయోగపడతాయని చెప్పారు. కంప్యూటింగ్ ఇన్ఫ్రాస్ట్రక్చర్, ఎక్సలెన్స్ సెంటర్లు, స్కిల్లింగ్, ఇంపాక్ట్ అసెస్మెంట్, స్టార్టప్ ఇన్నోవేషన్, జనరేటివ్ ఏఐ, రీసెర్చ్ అసిస్టెన్స్, డేటా యానోటేషన్ వంటి 7 విభాగాల్లో ఈ ఒప్పందాలను కుదుర్చుకున్నామని వివరించారు.
తప్పుడు సమాచారం, డీప్ఫేక్స్ కట్టడికి తగిన చర్యలను తీసుకుంటామన్నారు. కాగా.. 11.3 శాతం ఆర్థిక వృద్ధితో రాష్ట్ర జీఎస్డీపీ 176 బిలియన్ డాలర్లకు పెరిగిందని, దానిని ట్రిలియన్ డాలర్ల ఎకానమీగా మార్చడమే ప్రభుత్వ లక్ష్యమని మంత్రి శ్రీధర్బాబు తెలిపారు.
ఏఐపై సర్కారు ముందు నుంచీ పట్టుదలతో ఉంది: జయేశ్ రంజన్
హైదరాబాద్ సిటీని ఏఐ హబ్గా తీర్చిదిద్దేందుకు రాష్ట్ర ప్రభుత్వం ముందు నుంచీ పట్టుదలతో ఉందని ఐటీ, ఇండస్ట్రీస్ శాఖ కార్యదర్శి జయేశ్ రంజన్ అన్నారు. శ్రీధర్ బాబు మంత్రి అయ్యాక దీనిపై వరుస రివ్యూలు చేశారని, అందుకు తగ్గట్టు డిపార్ట్మెంట్ కసరత్తులు చేసిందని, సీఎం రేవంత్ రెడ్డి అన్నింటినీ ప్రోత్సహించారని తెలిపారు.
కొద్ది నెలల కింద అమెరికా, దక్షిణ కొరియా పర్యటనల్లో భాగంగా సీఎం రేవంత్ రెడ్డి తాము కలిసిన కంపెనీల ప్రతినిధులందరికీ ఏఐ గ్లోబల్ సమిట్ గురించి చెప్పారని ఆయన వివరించారు.
