- తక్కువ టైమ్లో సమగ్ర అభివృద్ధి: కవిత
- ఆక్స్ఫర్డ్ వర్సిటీలో ప్రసంగించిన ఎమ్మెల్సీ
హైదరాబాద్, వెలుగు: తెలంగాణ అభివృద్ధి మోడల్ దేశానికే దిక్సూచీగా నిలిచిందని ఎమ్మెల్సీ కల్వకుంట్ల కవిత అన్నారు. సీఎం కేసీఆర్ నాయకత్వంలో తక్కువ సమయంలో రాష్ట్రం అత్యంత వేగంగా సమగ్ర అభివృద్ధి సాధించిందని తెలిపారు. మంగళవారం ఉదయం ఆక్స్ ఫర్డ్ యూనివర్సిటీలో ‘‘ఎక్స్ప్లోరింగ్ఇంక్లూజివ్ డెవలప్మెంట్: ది తెలంగాణ మోడల్” అంశంపై ఆమె మాట్లాడారు. తెలంగాణ ఏర్పడేనాటికి పది జిల్లాల్లో తొమ్మిది జిల్లాలు అత్యంత వెనకబడినవని, రైతు ఆత్మహత్యల్లో రాష్ట్రం దేశంలోనే రెండో స్థానంలో ఉందన్నారు. 2,700 మెగావాట్ల విద్యుత్ కొరత ఉండేదని, పరిశ్రమలకు వారంలో రెండు రోజులు పవర్ హాలిడే ఇచ్చారని గుర్తు చేశారు.
తొమ్మిదిన్నరేండ్లలోనే మిగులు విద్యుత్ ఉన్న రాష్ట్రంగా అవతరించిందని, ధాన్యం ఉత్పత్తిలో దేశంలోనే రెండో స్థానానికి చేరిందన్నారు. పదేండ్లలో దేశ జీడీపీ గ్రోత్118.2% పెరగ్గా, తెలంగాణ జీఎస్డీపీ 155.7% పెరిగిందని తెలిపారు. 2013–14లో తలసరి ఆదాయం రూ.1.12 లక్షలు ఉంటే 2022 – 23 నాటికి రూ.3.14 లక్షలకు పెరిగిందన్నారు. ధరణితో 99% భూ రికార్డుల ప్రక్షాళన జరిగిందని చెప్పారు. రికార్డు సమయంలోనే కాళేశ్వరం ఎత్తిపోతలను పూర్తి చేశామని, రాష్ట్రంలో సాగు విస్తీర్ణం 1.31 కోట్ల ఎకరాల నుంచి 2 కోట్ల ఎకరాలకు పెంచామన్నారు. పాలమూరు రంగారెడ్డి ప్రాజెక్టు పూర్తయితే ఇంకో 50 లక్షల ఎకరాలు సాగులోకి వస్తుందన్నారు.
