- డిసెంబర్ నెలాఖరు వరకు రిజర్వేషన్లపై స్పష్టత
- మూడు విడతల్లో ఎన్నికల నిర్వహణపై సర్కార్ కసరత్తు
హైదరాబాద్, వెలుగు : రాష్ట్రంలో పంచాయతీ ఎన్నికలకు సర్కార్ సిద్ధమవుతున్నది. వచ్చే జనవరిలో ఎన్నికలు నిర్వహించేందుకు ప్లాన్ చేస్తు న్నది. ఓవైపు కులగణన సర్వే, బీసీ డెడికేటెడ్ కమిషన్ సమావేశాలు కొనసాగుతుండడం.. రిజర్వేషన్లకు సంబంధించి హైకోర్టులో వచ్చె నెలలో హియరింగ్ ఉండడంతో.. డిసెంబర్ రెండో వారం కల్లా ఈ ప్రక్రియనంతా సవ్యంగా ముగించి.. జనవరిలో ఎన్నికలు కంప్లీట్ చేయాలని యోచిస్తున్నది. కులగణన సర్వే వివరాలు రాగానే వాటిని డెడికేటెడ్ కమిషన్కు ప్రభుత్వం అందించనున్నది.
అందులోని వివరాలు, కమిషన్ చేసిన అధ్యయన నివేదిక రెండింటి ఆధారంగా రిజర్వేషన్లను ఎంతమేరకు పెంచవచ్చనేదానిపై ప్రభుత్వానికి సిఫార్సు చేయనుంది. అందుకు అనుగుణంగా రిజర్వేషన్లను ఖరారు చేసి.. ఎన్నికలు నిర్వహించనున్నారు. ఈ ప్రక్రియ అంతా డిసెంబర్ చివరిలోగా పూర్తి కానున్నట్టు ప్రభుత్వ వర్గాలు వెల్లడించాయి. జనవరి మొదటి వారం లేదా డిసెంబర్ చివరలోనే షెడ్యూల్ రిలీజ్ చేసి.. సంక్రాంతి పండుగ తర్వాత పోలింగ్ నిర్వహించనున్నట్టు చర్చ జరుగుతున్నది.
4 వేల నుంచి 5 వేల గ్రామాలకు ఒక విడత చొప్పున.. మూడు విడతల్లో ఎన్నికలు పూర్తయ్యేలా ప్రణాళికలు సిద్ధం చేస్తున్నట్టు తెలిసింది. ఇప్పటికే ఓటరు జాబితాను రాష్ట్ర ఎన్నికల సంఘం తెప్పించుకుని, గ్రామాలు, వార్డుల వారీగా పబ్లిష్ చేసింది. షెడ్యూల్ రిలీజ్ కంటే ముందు మరోసారి సప్లిమెంటరీ ఓటర్ల జాబితాను తీసుకోనుంది.
సర్పంచుల పదవీకాలం ముగియడంతో ఈ ఏడాది ఫిబ్రవరి 1 నుంచి స్పెషల్ ఆఫీసర్ల పాలనలో జీపీలు కొనసాగుతున్నాయి. మరోవైపు, ఇందిరమ్మ ఇళ్ల స్కీం స్టార్ట్ చేయడంతో పాటు, కొండ పోచమ్మ దగ్గర బీఆర్ఎస్ ఎమ్మెల్యే హరీశ్రావు గెస్ట్హౌస్పై ప్రభుత్వం విచారణ చేపడుతుంది.
