- అత్యధికంగా 9999 నంబర్కు రూ.25 లక్షలు
హైదరాబాద్, వెలుగు: తెలంగాణ ఆర్టీఏకు ఫ్యాన్సీ నంబర్ల వేలం ద్వారా భారీగా ఆదాయం వస్తోంది. టీజీ రిజిస్ట్రేషన్ ప్రారంభమైనప్పటి నుంచి ఫ్యాన్సీ నంబర్లకు పెద్దఎత్తున స్పందన వస్తున్నట్టు అధికారులు తెలిపారు. సోమవారం ఒక్కరోజే ఖైరతాబాద్ సెంట్రల్ జోన్ పరిధిలో రూ.43.70 లక్షల ఆదాయం సమకూరినట్టు ఆర్టీఏ అధికారులు ప్రకటించారు. వేలంలో సోనీ ట్రాన్స్పోర్ట్ సొల్యూషన్స్.. టీజీ 09 9999 నంబర్ను రూ.25,50,002 లకు దక్కించుకుంది. అలాగే టీజీ 09ఎ 0006 నంబర్ను రామకృష్ణ ఎర్రమనేని అనే వ్యక్తి రూ.2,76,000లకు దక్కించుకున్నారు.
టీజీ09 ఎ 0005 నంబర్ను యారో అడ్వర్టయిజింగ్ ఇండియా ప్రైవేట్ లిమిటెడ్ సంస్థ రూ.1,80,200 పెట్టి దక్కించుకుంది. టీజీ09 ఎ 0019 నంబర్ను యలమంచిలి గోపాల కృష్ణ 1,20,019 రూపాయలకు దక్కించుకున్నారు. టీజీ 09 ఎ 0009 నంబర్ను ఎస్కే కార్లాంజ్ సంస్థ రూ.1,10,009కి దక్కించుకుంది. 9999 నంబర్కు రూ.25 లక్షలు పలకడం రాష్ట్రంలోనే రికార్డు అని ట్రాన్స్ పోర్ట్ జాయింట్ కమిషనర్ రమేశ్ కుమార్ మీడియాకు తెలిపారు.
