- సామగ్రి తరలింపు, ఇతర ఖర్చులకు నగదు పంపిణీకి నిర్ణయం
- మూడు జిల్లాల్లో డబుల్ ఇండ్ల సమస్యల పరిష్కారానికి గ్రీవెన్స్ సెల్స్ ఏర్పాటు
హైదరాబాద్ సిటీ/ గండిపేట్, వెలుగు: మూసీ రివర్ బెడ్నిర్వాసితులకు డబుల్ బెడ్రూం ఇంటితో పాటు సామగ్రి తరలింపు, ఇతర ఖర్చుల కోసం రూ.25 వేలు ఇవ్వనున్నట్టు రాష్ట్ర ప్రభుత్వం ప్రకటించింది. మొదట నిర్వాసితులకు డబుల్ ఇండ్లు మాత్రమే కేటాయించిన ప్రభుత్వం.. తాజాగా ప్రతి కుటుంబానికి రూ.25 వేలు చెల్లించనున్నట్టు తెలిపింది. ఈ మేరకు హైదరాబాద్, మేడ్చల్ మల్కాజ్ గిరి, రంగారెడ్డి జిల్లాల కలెక్టర్లు బుధవారం ప్రకటన విడుదల చేశారు.
ఇప్పటికే అధికారులు మూసీ రివర్ బెడ్ పరిధిలో నిర్వాసితులను సమీప ప్రాంతాల్లో ఉన్న డబుల్ బెడ్రూం ఇండ్లకు తరలించారు. ఖాళీ చేసిన ఇండ్లను మరెవరైనా ఆక్రమిస్తారనే కారణంతో మంగళవారం మలక్పేట్ సెగ్మెంట్ లో నిర్వాసితులే స్వచ్ఛందంగా 150 ఇండ్లను తొలగించుకున్నారు.
డబుల్ ఇండ్లకు 230 కుటుంబాలు..
గ్రేటర్ లో మూసీ రివర్ బెడ్పరిధిలోకి వచ్చే ఇండ్లకు రెవెన్యూ అధికారులు ఆర్బీ – ఎక్స్ మార్క్ వేశారు. హైదరాబాద్ జిల్లాలో మొత్తం 1,595 నిర్మాణాలను గుర్తించగా.. 1,332 నిర్మాణాలకు మార్కింగ్ చేశారు. గత నాలుగైదు రోజులుగా 174 కుటుంబాలు సమీప డబుల్ ఇండ్లకు తరలివెళ్లాయి. మలక్ పేట్, చాదర్ ఘాట్ పరిధిలో మంగళవారం డబుల్ ఇండ్లకు వెళ్లిన నిర్వాసితులే స్వచ్ఛందంగా 151 ఇండ్లను కూలగొట్టుకున్నారు. మేడ్చల్ జిల్లాలో మొత్తం 108 నిర్మాణాలకు మార్కింగ్ చేయగా.. 33 కుటుంబాలను డబుల్ ఇండ్లకు తరలించారు. రంగారెడ్డి జిల్లాలో రాజేంద్రనగర్ మండల ప్రాంతంలో మొత్తం 173 నిర్మాణాలకు మార్కింగ్ చేయగా.. 23 కుటుంబాలను డబుల్ ఇండ్లకు తరలించారు. మూడు జిల్లాల్లో కలిపి డబుల్ ఇండ్లకు తరలిన మొత్తం 230 కుటుంబాల యజమానులకు అధికారులు త్వరలో రూ.25 వేలు అందించనున్నారు. ఇకపై స్వచ్ఛందంగా డబుల్ ఇండ్లకు తరలే మూసీ రివర్ బెడ్ నిర్వాసితులకు కూడా డబ్బులు ఇవ్వనున్నట్టు అధికారులు తెలిపారు.
మూడు జిల్లాల్లో గ్రీవెన్స్ సెల్స్
డబుల్ ఇండ్లలోకి వెళ్లిన నిర్వాసితుల సమస్యల పరిష్కారం కోసం ప్రభుత్వం చర్యలు చేపడుతోంది. డబుల్ఇండ్లలోకి వెళ్లాక ఏవైనా సమస్యలు ఎదురైతే.. ఫిర్యాదు చేయాలని మూడు జిల్లాల్లో గ్రీవెన్స్సెల్స్ ఏర్పాటు చేసింది. హైదరాబాద్, మేడ్చల్ జిల్లా కలెక్టరేట్ లలో గ్రీవెన్స్సెల్స్ ఏర్పాటు చేయగా, రంగారెడ్డి జిల్లాలో రాజేంద్రనగర్ లోని ఆర్డీవో ఆఫీస్ లో ఏర్పాటు చేసింది. డబుల్ ఇండ్లలోకి వెళ్లిన నిర్వాసితులు ఇండ్లలోకి నీళ్లు రాకపోవడం, లిఫ్టులు పనిచేయకపోవడం, సెక్యూరిటీ లేకపోవడం తదితర సమస్యలతో ఇబ్బందులు పడుతున్నారు. అలాగే, పిల్లలను స్కూళ్లు, కాలేజీల్లో జాయిన్ చేయడం తదితర సమస్యలపై గ్రీవెన్స్ సెల్ లో ఫిర్యాదు చేస్తే సంబంధిత అధికారులు సమస్యలను పరిష్కరించనున్నారు.
