భద్రాచలం, వెలుగు : భద్రాచలం సీతారామచంద్రస్వామిని తెలంగాణ రాష్ట్ర గవర్నర్ జిష్ణుదేవ్ వర్మ శుక్రవారం దర్శించుకున్నారు. ఆయనకు దేవస్థానం ఈవో రమాదేవి ఆధ్వర్యంలో అర్చక బృందం పరివట్టం కట్టి పూర్ణకుంభంతో స్వాగతం పలికారు. అనంతరం లక్ష్మీతాయారు అమ్మవారి సన్నిధిలో పూజలు చేశారు. వేదపండితులు గవర్నర్కు వేదాశీర్వచనం ఇచ్చారు. ఈవో రమాదేవి సీతారామచంద్రస్వామి ఫొటోతో పాటు, జ్ఞాపికను, ప్రసాదాన్ని అందజేశారు. ఆంజనేయస్వామి ఆలయంలో పూజలనంతరం ఆయన కూనవరం రోడ్డులోని రెడ్క్రాస్ బిల్డింగ్లో నిర్మించిన తలసేమియా వార్డును ప్రారంభించారు.
తలసేమియా వ్యాధిగ్రస్తులకు ఉచితంగా నిర్వహించే ఎలక్ట్రో ప్రాసెస్, రక్తపరీక్షల కేంద్రాన్ని ప్రారంభించారు. కలెక్టర్ జితేశ్వి పాటిల్, ఎస్పీ రోహిత్ రాజు, ఐటీడీఏ పీవో రాహుల్, ఎంపీ పోరిక బలరాంనాయక్, ఎమ్మెల్యే డాక్టర్ తెల్లం వెంకట్రావు, రాష్ట్ర అటవీ అభివృద్ధి సంస్థ చైర్మన్, మాజీ ఎమ్మెల్యే పొదెం వీరయ్య తదితరులు
పాల్గొన్నారు.
భారీ బందోబస్తు
గవర్నర్ పర్యటన సందర్భంగా భద్రాచలం పట్టణంలో పోలీసులు ఆంక్షలు విధించారు. ఎక్కడికక్కడ బారికేడ్స్ ఏర్పాటు చేశారు. చర్ల మండలంలోని ఛత్తీస్గఢ్ బార్డర్ నుంచి గొత్తికోయలను కొందరు భద్రాచలంలో గవర్నర్తో భేటీ అయ్యేందుకు తీసుకొచ్చిన విషయాన్ని పసిగట్టిన పోలీసులు అలర్ట్ అయ్యారు. వెంటనే వారిని భద్రాచలం శివారున ఒక ఫంక్షన్ హాలులో నిర్బంధించారు. మావోయిస్టుల ప్రభావిత ప్రాంతం కావడంతో పోలీసులు ముందు జాగ్రత్త చర్యలో భాగంగా వారిని అదుపులోకి తీసుకున్నారు.
