![హాస్పిటళ్లలో టీజీఎంసీ తనిఖీలు](https://static.v6velugu.com/uploads/2024/07/telangana-state-medical-council-inspected-the-hospitals-in-godavarikhani_D6Ejk9NrfW.jpg)
గోదావరిఖని, వెలుగు : గోదావరిఖనిలో హాస్పిటళ్లపై తెలంగాణ స్టేట్ మెడికల్ కౌన్సిల్(టీజీఎంసీ) ఆధ్వర్యంలో శుక్రవారం తనిఖీలు చేశారు. ఐబీ కాలనీలో శ్రీనివాస హాస్పిటల్, శివ హర్షమొలల దవాఖానాలో తనిఖీలు చేసి అర్హత లేకపోయినా వైద్యం చేస్తున్నారని స్టేట్ కౌన్సిల్ మెంబర్ డాక్టర్ రాజ్కుమార్ వైద్య బృందం తేల్చింది. ఈ తనిఖీల్లో ఐబీ కాలనీలోని శ్రీనివాస క్లినిక్ పేరుతో టి.శ్రీనివాస్ అర్హత లేకపోయినా అల్లోపతి వైద్యం చేస్తున్నట్లు గుర్తించారు.
పేషెంట్లకు విచ్చలవిడిగా యాంటీ బయాటిక్స్, స్టెరాయిడ్స్ ఇస్తున్నట్టు ఆధారాలు సేకరించారు. అలాగే శివ అనే వ్యక్తి అర్హత లేకపోయినా అర్షమొలల దవాఖానా పేరిట వైద్యం చేస్తున్నట్టు గుర్తించారు. కాగా తనిఖీల సమాచారం తెలుసుకున్న నకిలీ డాక్టర్లు పరారయ్యారు. నకిలీ డాక్టర్లపై కేసు నమోదు చేసినట్టు డాక్టర్ రాజ్కుమార్ తెలిపారు.