సోయా కొనుగోళ్లలో తెలంగాణ టాప్

కేంద్రం ఇచ్చిన టార్గెట్లో 73 శాతం కొనుగోళ్లు
మార్క్ఫెడ్ ద్వారా 43 వేల టన్నులపైనే సేకరణ
రైతులకు రూ.138.16 కోట్ల చెల్లింపులు

హైదరాబాద్, వెలుగు: సోయా పంట కొనుగోళ్లలో దేశంలోనే తెలంగాణ టాప్లో నిలిచింది. రాష్ట్రంలో మార్క్ఫెడ్.. నోడల్ ఏజెన్సీగా సోయా పంట కొనుగోళ్లు చేస్తున్నది. ఈయేడు వానాకాలం సీజన్లో 4.01 లక్షల ఎకరాల్లో సోయా సాగైంది. రాష్ట్రవ్యాప్తంగా మార్క్ఫెడ్ 7 జిల్లాల్లో 42 కొనుగోలు సెంటర్ల ద్వారా సోయా పంటను సేకరిస్తోంది. గురువారం నాటికి 25,675 మంది రైతుల నుంచి సెంట్రల్ పూల్ కింద ఇప్పటి వరకు 43,755.50 టన్నుల సోయాను సేకరించింది. దీని కోసం మద్దతు ధర క్వింటాల్ రూ.4,892 చొప్పున రూ.214.05 కోట్ల విలువైన సోయాచిక్కుడును సేకరించింది. రైతులకు రూ.138.16 కోట్లు చెల్లించింది.

అత్యధికంగా ఆదిలాబాద్ జిల్లాలో 10 సెంటర్లు ఓపెన్ చేసి 22,292.70 టన్నుల సోయా కొనుగోళ్లు చేసింది. తరువాత నిర్మల్ జిల్లాలో 11కొనుగోలు సెంటర్లలో 11,567.40 టన్నుల సోయా కొనుగోళ్లు చేసింది. నిజామాబాద్ జిల్లాలో 10 కొనుగోలు సెంటర్లలో 4,103.40 టన్నులు, కామారెడ్డి జిల్లాలో 7 సెంటర్లలో 3,891.80 టన్నులు, సంగారెడ్డి జిల్లాలో 5 సెంటర్లలో 1800.85 టన్నుల సోయాచిక్కుడును సేకరించింది. తక్కువ గడువులోనే 43,755.50 టన్నుల సోయా సేకరించామని మార్క్ఫెడ్ ఎండీ శ్రీనివాస్రెడ్డి తెలిపారు.

Also Read : ఫుడ్ పాయిజన్ జరగకుండా కలెక్టర్లతో కమిటీలు వేస్తం

ఆరు రాష్ట్రాల్లో తెలంగాణ టాప్

రాష్ట్రంలో సాగైన సోయా పంటలో 2.38 లక్షల టన్నుల సోయాబీన్ దిగుబడి అంచనాల్లో 25 శాతం (59,508 టన్నులు) సేకరించాలని టార్గెట్ పెట్టగా ఇప్పటికే 43,755.50 టన్నుల సేకరణ జరింది. ఇచ్చిన టార్గెట్లో 73.52 శాతం పూర్తిచేసి దేశంలోనే తెలంగాణ టాప్లో నిలిచింది. మధ్యప్రదేశ్లో వచ్చిన 52.85 లక్షల దిగుబడిలో 25 శాతం చొప్పున 13.68 లక్షల టన్నులు సేకరించాలని కేంద్ర ప్రభుత్వం టార్గెట్ పెట్టగా 2 శాతమే సేకరించారు.

మహారాష్ట్రలో సాగైన సోయాలో 56.33 లక్షల దిగుబడి అంచనాల్లో 14.13 లక్షల టన్నులు (25 శాతం) టార్గెట్ విధించగా 1.03 శాతం మాత్రమే సేకరించారు. రాజస్థాన్ లో 11.77 లక్షల టన్నుల దిగుబడి అంచనాల్లో 25 శాతం సేకరించాలని నాఫెడ్ టార్గెట్ పెట్టగా 0.48శాతం మాత్రమే సేకరించింది. గుజరాత్లో 4.56 లక్షల దిగుబడి అంచనాల్లో 25 శాతం సేకరించాల్సి ఉండగా ఇప్పటి వరకు 0.15 శాతమే సేకరణ జరిగింది.