భద్రాచలం, వెలుగు : ఆదివాసీ మహిళలు తయారు చేసిన వివిధ ఉత్పత్తులను ట్రైఫ్డ్ సంస్థ ద్వారా కొనుగోలు చేయనున్నట్లు భద్రాచలం, పినపాక ఎమ్మెల్యేలు డాక్టర్ తెల్లం వెంకట్రావ్, పాయం వెంకటేశ్వర్లు తెలిపారు. ఐటీడీఏ గిరిజన భవనంలో శుక్రవారం ట్రైఫ్డ్ ఆధ్వర్యంలో గిరిజనుల హస్తకళల, అటవీ, చేనేత ఉత్పత్తుల ప్రదర్శన మేళాను వారు ప్రారంభించారు. ఈ సందర్భంగా మాట్లాడుతూ ఆదివాసీ మహిళలతో సొసైటీలు ఏర్పాటు చేసి, వారికి ట్రైనింగ్ ఇప్పించి ఉత్పత్తులు తయారు చేయించి వారి జీవనోపాధికి రాష్ట్ర ప్రభుత్వం కృషి చేస్తోందని తెలిపారు.
ఈ వస్తువులు తెలుగు రాష్ట్రాలే కాకుండా మెట్రో సిటీల్లో కూడా ప్రదర్శనకు పెట్టి అమ్మనున్నట్లు చెప్పారు. ట్రైఫ్డ్ రీజనల్ మేనేజర్ శ్రీనివాస్ సంకె మాట్లాడుతూ ఆరు వేల గిరిజన కుటుంబాలను గుర్తించి వారికి ట్రైనింగ్ ఇచ్చి వారు తయారు చేసిన వస్తువులకు మార్కెటింగ్ కల్పిస్తున్నామన్నారు. మేళాను ఎమ్మెల్యేలు పరిశీలించి ఆదివాసీల ప్రతిభను మెచ్చుకున్నారు. ఓ ఆదివాసీ యువకుడు ఎమ్మెల్యే తెల్లం చిత్రాన్ని గీసి బహుకరించాడు. ఈ కార్యక్రమంలో ఏపీవో జనరల్ డేవిడ్రాజ్, ఎస్వో సురేశ్కుమార్, జీసీసీ డీఎం దావీదు పాల్గొన్నారు.
