- పెండ్లి పేరుతో మోసం చేశాడని మహిళ ఫిర్యాదు
కూకట్పల్లి, వెలుగు: సినీ నటుడు శ్రీతేజ్పై కూకట్పల్లి పోలీసులు కేసు నమోదు చేశారు. పెండ్లి పేరుతో తనను మోసం చేశాడని ఆరోపిస్తూ ఓ మహిళ పోలీసులు ఫిర్యాదు చేసింది. ఏపీలోని ప్రకాశం జిల్లా కారంచేడుకు చెందిన మహిళ (35) మొయినాబాద్లో నివాసం ఉంటోంది. కొన్నేండ్ల క్రితం శ్రీతేజ్తో ఒక ఈవెంట్లో ఆమెకు పరిచయం ఏర్పడింది. దీంతో తన భార్యకు విడాకులిచ్చి ఆ మహిళను పెండ్లి చేసుకుంటానని నమ్మించాడు. తన అవసరాలకు ఆమె వద్ద రూ. 20 లక్షలు తీసుకున్నాడని బాధితురాలు ఫిర్యాదులో పేర్కొంది.
తనను పెండ్లి చేసుకోవాలని ఆమె ఒత్తిడి చేయడంతో శ్రీతేజ్ తప్పించుకుని తిరుగుతున్నాడు. అతడు మరో మహిళతో సంబంధం పెట్టుకున్నాడని గుర్తించిన బాధితురాలు.. గత ఏప్రిల్లో కూకట్పల్లి పోలీసులకు ఫిర్యాదు చేసింది. అయితే ఆ సమయంలో శ్రీతేజ్.. బాధితురాలికి మాయమాటలు చెప్పి ఆ ఫిర్యాదుని వెనక్కు తీసుకునేలా చేశాడు. మళ్లీ ఎప్పటిలాగానే ప్రవర్తిస్తుండడంతో శ్రీతేజ్ పై గచ్చిబౌలి పోలీస్ స్టేషన్లో ఆ మహిళ ఫిర్యాదు చేసింది. అక్కడ జీరో ఎఫ్ఐఆర్ నమోదు చేసిన పోలీసులు.. కేసుని కూకట్పల్లికి పోలీస్ స్టేషన్ కు బదిలీ చేశారు.
