- ఆదిలాబాద్, ఆసిఫాబాద్, మంచిర్యాల, నిర్మల్ జిల్లాలకు ఆరెంజ్ అలర్ట్
హైదరాబాద్, వెలుగు:రాష్ట్రంలో రాబోయే వారం రోజుల్లో చలి తీవ్రత పెరగనుందని వాతావరణ శాఖ (ఐఎండీ) తెలిపింది. రాత్రి ఉష్ణోగ్రతలు సాధారణం కన్నా 3 నుంచి 5 డిగ్రీలు తక్కువగా నమోదయ్యే అవకాశం ఉందని వెల్లడించింది. రాబోయే నాలుగు రోజుల పాటు ఉత్తర తెలంగాణలోని ఆదిలాబాద్, కుమ్రంభీం ఆసిఫాబాద్, మంచిర్యాల, నిర్మల్ జిల్లాలకు ఆరెంజ్ అలర్ట్ను జారీ చేయగా.. సంగారెడ్డి, మెదక్, వికారాబాద్, రంగారెడ్డి జిల్లాలకు ఎల్లో అలర్ట్ను ఇచ్చింది.
మిగతా జిల్లాల్లో సాధారణం కన్నా కొంచెం ఎక్కువ ఉష్ణోగ్రతలు నమోదవుతాయని తెలిపింది. తెల్లవారుజాము నుంచి ఉదయం వరకు పొగమంచు ఎక్కువగా ఉండే అవకాశం ఉందని పేర్కొంది. హైదరాబాద్ సిటీలో రెండు రోజులు మబ్బు పట్టి ఉంటుందని, ఉదయం వేళల్లో పొగమంచు కురుస్తుందని తెలిపింది.
టెంపరేచర్లు తక్కువగా రికార్డయ్యే జిల్లాల్లో ప్రజలు జాగ్రత్తలు పాటించాలని నిపుణులు సూచిస్తున్నారు. చలి నుంచి రక్షించుకునే దుస్తులు వేసుకోవాలని చెబుతున్నారు. మరోవైపు మంగళవారం రాత్రి ఆదిలాబాద్లో అత్యల్పంగా 8.5 డిగ్రీల కనిష్ట ఉష్ణోగ్రత రికార్డయింది. నిరుడు ఇదే రోజు 11.2 డిగ్రీల టెంపరేచర్ నమోదవగా.. ఇప్పుడు చలి ఎక్కువగా ఉన్నది.
ALSO READ : తెలుగు మీడియం కనుమరుగు .. ప్రైవేట్, ఎయిడెడ్ స్కూళ్లలో అంతా ఆంగ్లమయమే
ఆసిఫాబాద్ జిల్లాలో 9.7 డిగ్రీల కనిష్ట ఉష్ణోగ్రత నమోదైంది. అంతకుముందు ఏడాది ఇదే రోజు అక్కడ 10.5 డిగ్రీల టెంపరేచర్ నమోదైంది. నిర్మల్ జిల్లాలో 11.5, జగిత్యాల జిల్లాలో 12.3, సంగారెడ్డిలో 13, పెద్దపల్లిలో 13.1, సిరిసిల్ల, సిద్దిపేట జిల్లాల్లో 13.2, కామారెడ్డిలో 13.3, భూపాలపల్లిలో 13.4 డిగ్రీల మేర టెంపరేచర్లు నమోదయ్యాయి. హైదరాబాద్లో అత్యల్పంగా మౌలాలిలో 14.3 డిగ్రీల ఉష్ణోగ్రత నమోదైంది.
