- రాష్ట్రంలో పార్లమెంట్ ఎన్నికల ప్రచారమంతా ఈ అంశం చుట్టే
- కాంగ్రెస్ వంద రోజుల పాలనే లక్ష్యంగా బీఆర్ఎస్, బీజేపీ అటాక్
- పదేండ్లలో ఏం చేశారో చెప్పాలని కౌంటర్ అటాక్ చేసిన కాంగ్రెస్
- రాజ్యాంగం, రిజర్వేషన్ల అంశాలపై బీజేపీని ఇరుకునపెట్టిన రేవంత్
- గ్యారంటీలు, 30 వేల ఉద్యోగాలు, రైతు భరోసాపై కాంగ్రెస్ నేతల ధీమా
- ఫ్రీ బస్ జర్నీ, రూ. 500 సిలిండర్లాంటి స్కీములతో మహిళల ఓట్లు గంపగుత్తగా పడ్తాయని నమ్మకం
- అందుకే వంద రోజుల పాలనకు ఈ ఎన్నికలు రెఫరెండమన్న సీఎం
హైదరాబాద్, వెలుగు : రాష్ట్రంలో నెల రోజులుగా మూడు ప్రధాన పార్టీల మధ్య హోరాహోరీగా సాగిన లోక్సభ ఎన్నికల పోరులో కీలకమైన ప్రజాతీర్పు సోమవారం ఈవీఎంలలో నిక్షిప్తం కానుంది. తమకు 14 సీట్లు వస్తాయని కాంగ్రెస్.. తమకు పది దాటుతాయని బీజేపీ.. 12 నుంచి 14 తెచ్చుకుంటామని బీఆర్ఎస్ నేతలు ఎవరికి వారు ధీమా వ్యక్తం చేస్తున్నారు. కానీ, అధికారంలోకి వచ్చి ఐదు నెలలు కూడా నిండని కాంగ్రెస్ సర్కారును పదేండ్ల పాటు దేశాన్ని పాలించిన బీజేపీ, రాష్ట్రాన్ని పాలించిన బీఆర్ఎస్ టార్గెట్ చేయడం ఈ ఎన్నికల్లో కీలకాంశంగా మారింది.
పదేండ్ల పాలనలో ఏమి చేశామో చెప్పుకొని ఓట్లడగాల్సిన బీజేపీ, బీఆర్ఎస్ నేతలు.. అది కాకుండా వంద రోజుల్లో కాంగ్రెస్ ఏమి చేసిందో చెప్పాలంటూ నిలదీయడం ఆసక్తి రేపింది. బీజేపీలో ప్రధాని నరేంద్ర మోదీ మొదలుకొని ఆ పార్టీ రాష్ట్ర అధ్యక్షుడు కిషన్రెడ్డి వరకు.. బీఆర్ఎస్లో మాజీ సీఎం కేసీఆర్ మొదలుకొని కేటీఆర్, హరీశ్రావు వరకు అందరూ వందరోజుల కాంగ్రెస్ పాలననే ప్రధానంగా టార్గెట్ చేశారు. ప్రత్యర్థుల విమర్శలు, ఆరోపణలకు సీఎం రేవంత్రెడ్డితో పాటు మంత్రులు కౌంటర్ ఇచ్చారు.
వంద రోజుల ప్రజాపాలనలో తాము ఐదు గ్యారంటీలు అమలు చేశామని, కోతలు లేని కరెంట్ ఇస్తున్నామని, రైతు భరోసా వేశామని, ఆగస్టు 15కల్లా రైతు రుణ మాఫీ లాంటి హామీలను అమలు చేయబోతున్నామని ప్రతి సభలో చెప్పిన సీఎం రేవంత్.. మరి పదేండ్ల పాలనలో మీరు ఏం చేశారో చెప్పాలని బీజేపీ, బీఆర్ఎస్ నేతలను నిలదీశారు. పదేండ్లలో రాష్ట్రాన్ని బీఆర్ఎస్ రూ. 7 లక్షల కోట్ల అప్పుల కుప్పగా మారిస్తే .. బీజేపీ తెలంగాణకు ఇచ్చింది గాడిద గుడ్డు మాత్రమే అంటూ తనదైన శైలిలో కౌంటర్లు ఇచ్చారు.
బరాబర్ఈ ఎన్నికలు వంద రోజుల పాలనకు రెఫరెండమేనని సీఎం రేవంత్రెడ్డి పలుమార్లు స్పష్టం చేశారు. ఇక మోదీ సర్కారు మూడోసారి అధికారంలోకి వస్తే రాజ్యాంగాన్ని మార్చి, రిజర్వేషన్లు రద్దు చేస్తుందంటూ చివరి పది రోజులు రేవంత్ సాగించిన ప్రచారం దేశవ్యాప్తంగా హాట్టాపిక్గా మారింది. మొత్తం మీద రాష్ట్రంలో పార్లమెంట్ ఎన్నికల ప్రచారమంతా బీఆర్ఎస్, బీజేపీ పదేండ్ల పాలన వర్సెస్ కాంగ్రెస్ వంద రోజుల పాలన అన్నట్లుగా సాగింది.
ఎన్నికల ప్రచారంలో భాగంగా బీజేపీ, బీఆర్ఎస్ నేతలు ప్రధానంగా కాంగ్రెస్ వంద రోజుల పాలనను టార్గెట్ చేశారు. కాంగ్రెస్వల్లే కరువు వచ్చిందని, పంటలు ఎండిపోయాయని మొదట్లో బీఆర్ఎస్ నుంచి కేసీఆర్, కేటీఆర్, హరీశ్రావు లాంటి నేతలు ఆరోపించారు. కానీ, డిసెంబర్లో అధికారంలోకి వచ్చిన తాము కరువుకు ఎలా కారణమవుతామని సీఎం రేవంత్ సహా మంత్రులు గట్టి కౌంటర్ ఇయ్యడంతో బీఆర్ఎస్ నేతలు కరెంట్ అంశంపై ఫోకస్ చేశారు.
కాంగ్రెస్ హయాంలో పవర్కట్స్ తీవ్రమయ్యాయని ఆరోపించడం మొదలుపెట్టారు. తాను సూర్యాపేటలో , మహబూబ్నగర్లో ఉండగా కరెంట్ పోయిందని స్వయంగా కేసీఆర్ చెప్పగా.. అసలు ఆ సమయంలో అక్కడ కరెంటే పోలేదని డిప్యూటీ సీఎం భట్టి విక్రమార్క, ట్రాన్స్కో ఆధారాలతో బయటపెట్టడంతో ఈ అంశం బీఆర్ఎస్కు బూమరాంగ్అయింది. దీంతో బీఆర్ఎస్ నేతలు.. ఆరు గ్యారంటీలు సరిగ్గా అమలు కావడం లేదని, రైతు భరోసా ఇయ్యలేదని, పంట రుణమాఫీ చేయలేదని ఆరోపించారు. ఆరు గ్యారంటీలు నిరంతర ప్రక్రియ అని, ఎన్నికల కోడ్ తర్వాత ఎప్పుడైనా అప్లై చేసుకోవచ్చని
అర్హులందరికీ పథకాలు అందుతాయని సర్కారు అప్పటికే స్పష్టత ఇచ్చింది. 90 శాతానికి పైగా రైతుల అకౌంట్లలో రైతుభరోసా కూడా వేసింది. ఇక ఆగస్టు 15 వరకు రూ.2లక్షల పంట రుణాలను మాఫీ చేస్తానని సీఎం రేవంత్ ప్రతి సభలో హామీ ఇస్తూ వచ్చారు. దీంతో బీఆర్ఎస్కు ఒకదశలో ప్రచారాస్త్రాలు కరువయ్యాయి. ఇక అవినీతిలో బీఆర్ఎస్, కాంగ్రెస్ ఒకటేనని బీజేపీ నేతలు ప్రతి సభలో ఆరోపిస్తూ వచ్చారు. కాళేశ్వరంలో అవినీతికి పాల్పడిన బీఆర్ఎస్ నేతలను కాంగ్రెస్ ప్రభుత్వం కాపాడుతోందని ఫైర్ అయ్యారు.
దీనికి సీఎం రేవంత్రెడ్డి సహా మంత్రులు, కాంగ్రెస్ నేతలు కౌంటర్లు ఇచ్చారు. ‘‘పదేండ్లు కేంద్రంలో అధికారంలో ఉన్నది మీరే కదా.. మరి బీఆర్ఎస్ అవినీతిపై ఎందుకు చర్యలు తీసుకోలేదు”అంటూ బీజేపీని నిలదీశారు. బీజేపీ, బీఆర్ఎస్ మధ్య ఒప్పందం ఉంది కాబట్టే ఎలాంటి చర్యలు తీసుకోలేదని విమర్శించారు. మేడిగడ్డ బ్యారేజీ కుంగిన ఘటనతో పాటు విద్యుత్ కొనుగోళ్లలో అక్రమాలపై తాము అధికారంలోకి వచ్చిన ఈ వందరోజుల్లోనే జ్యుడీషియల్ఎంక్వైరీ వేశామని.. ఫోన్ ట్యాపింగ్పై కూడా ఇన్వెస్టిగేషన్ జరుగుతున్నదని చెప్పారు.
గ్యారంటీలు, రుణమాఫీపై కాంగ్రెస్ ధీమా
వంద రోజుల్లోనే గ్యారంటీల అమలు, 30 వేల ఉద్యోగాల భర్తీ, టీఎస్పీఎస్సీ ప్రక్షాళన, రైతుభరోసా నిధులు రైతులకు చేరడం, ఆగస్టు 15లోగా రుణమాఫీ చేస్తామని సీఎం రేవంత్ రెడ్డి ప్రతి మీటింగ్లో స్పష్టంగా ప్రకటించడం తమకు కలిసివస్తాయని కాంగ్రెస్ ధీమాగా ఉంది. రైతు భరోసా, రుణమాఫీతో పాటు అకాల వర్షాలకు పంట నష్టం కింద పరిహారం అందించడం, పంటల బీమాను కూడా అమల్లోకి తీసుకురావడం లాంటి చర్యల వల్ల రైతుల ఓట్లు తమకే పడ్తాయని ఆ పార్టీ నేతలు భావిస్తున్నారు.
ముఖ్యంగా మహిళలకు ఫ్రీ బస్సు జర్నీ, రూ.500కే గ్యాస్ సిలిండర్తో పాటు ఎన్నికల తర్వాత అమలుచేస్తామని చెప్పిన రూ.2,500 మహాలక్ష్మి స్కీముల వల్ల మహిళా ఓటర్లంతా చెయ్యి గుర్తుకే ఓటేస్తారని ఆశిస్తున్నారు. ఈ ఎన్నికల్లో తమకు బీజేపీ నుంచే గట్టి పోటీ ఉంటుందని భావించిన సీఎం రేవంత్.. తన ప్రచారంలో ప్రధానంగా ఆ పార్టీనే టార్గెట్చేస్తూ వచ్చారు. ముఖ్యంగా బీజేపీ 400 సీట్లు అడుగుతుండడం వెనుక రాజ్యాంగాన్ని మార్చి, రిజర్వేషన్లను ఎత్తేసే కుట్ర దాగి ఉందని ఆరోపించిన ఆయన.. ఆ అంశాన్ని జనాల్లోకి బలంగా తీసుకెళ్లగలిగారు.
బీజేపీ విద్వేష రాజకీయాల వల్ల హైదరాబాద్కు కంపెనీలు రాకుండా పోయే ప్రమాదముందని, బీజేపీ పాలిత ఉత్తరప్రదేశ్లో పెట్టుబడులు రాకపోవడానికి ఇదే కారణమని చివరి రెండు రోజుల ప్రచారంలో గట్టిగా చెప్పారు. నిజానికి ఎన్నికల కోడ్వచ్చేనాటికి కాంగ్రెస్ ప్రభుత్వం ఏర్పడి మూడున్నర నెలలే అయింది. ఇంత తక్కువ టైంలోనే కీలకమైన గ్యారంటీలు అమలు చేయడం మొదలు పెట్టామని, దీని వల్ల జనంలో తమ పార్టీపై మరింత నమ్మకం ఏర్పడిందని కాంగ్రెస్ నేతలు అంటున్నారు. గత బీఆర్ఎస్ ప్రభుత్వం పదేండ్ల పాలనలో దాదాపు రూ.7 లక్షల కోట్ల అప్పులు చేసి
ఖాళీ ఖజానాను కాంగ్రెస్‌‌‌‌‌‌‌‌‌‌‌‌‌‌‌‌కు అప్పజెప్పి వెళ్లిపోయిందనే విషయాన్ని జనంలోకి సీఎం రేవంత్రెడ్డి టీమ్ తీసుకెళ్లింది. విద్యుత్ సంస్థలను రూ. 81వేల కోట్ల అప్పుల్లో ముంచారని, లక్ష కోట్లతో నిర్మించిన కాళేశ్వరం కుంగిపోయి పనికిరాని ప్రాజెక్టుగా మారిందని ప్రజల్లో చర్చ పెట్టగలిగారు. అదే టైంలో కొత్త సర్కారు కొలువుదీరి పట్టుమని పది రోజులు కాకముందు నుంచే
ఈ ప్రభుత్వం ఎక్కువ కాలం ఉండదని, త్వరలోనే కూలిపోతుందని బీఆర్ఎస్, బీజేపీ నేతలు చేసిన కామెంట్ల వల్ల కాంగ్రెస్సర్కారుకు జనాల్లో సానుభూతి వచ్చిందని, అది కూడా తాజా ఎన్నికల్లో తమకే కలిసివస్తుందని హస్తం నేతలు నమ్ముతున్నారు.
