హైదరాబాద్: వనస్థలిపురం కమ్మగూడలో తీవ్ర ఉద్రిక్తత నెలకొంది. కమ్మగూడ సర్వే నంబర్ 240లోని 10 ఎకరాల భూమి విషయంలో ప్లాట్స్ ఓనర్స్కి, పట్టదారులకు మధ్య గత కొద్ది రోజులుగా వివాదం నడుస్తోన్న విషయం తెలిసిందే. ఈ క్రమంలో భూ యజమానికి అనుకూలంగా కొద్దిరోజుల క్రితం హైకోర్ట్ తీర్పు ఇచ్చింది. దీంతో భూ యజమాని బుధవారం (ఏప్రిల్ 9) ఆ భూమిలో పనులు చేసుకుంటుండగా ప్లాట్ ఓనర్స్ అడ్డుకున్నారు.
ఈ క్రమంలో ప్లాట్స్ ఓనర్స్, పట్టదారుల మధ్య వివాదం చేలరేగింది. ఇరువర్గాలు పరస్పరం దాడులకు దిగారు. సమాచారం అందుకున్న పోలీసులు ఘటన స్థలానికి చేరుకుని ఇరువర్గాలకు సర్దిచెప్పే ప్రయత్నం చేశారు. అయినప్పటికీ వెనక్కి తగ్గని ఇరువర్గాలు పోలీసుల ముందే ఒకరిపై ఒకరు దాడులు చేసుకున్నారు. ఈ ఘర్షణలో బస్సుల అద్దాలు ధ్వంసం అయ్యాయి.
ప్లాట్ ఓనర్లు ఆగ్రహంతో పలు బైక్లకు నిప్పు పెట్టారు. బైకులు మంటల్లో పూర్తిగా దగ్ధమయ్యాయి. పరిస్థితి చేయి దాటుతుండటంతో అప్రమత్తమైన పోలీసులు.. ఇరువర్గాలను చెదరగొట్టారు. ఎలాంటి అవాంఛనీయ ఘటనలు చోటు చేసుకోకుండా ఘటన స్థలంలో పోలీసులను మోహరించారు.
