- సీపీఐ, కాంగ్రెస్ మధ్య పొత్తులు.. సీట్లపై కొనసాగుతున్న సస్పెన్స్
- బీఆర్ఎస్ క్యాండెట్లకు బీఫారాలిచ్చిన కేసీఆర్
- ఇంకా ఖరారు కాని బీజేపీ అభ్యర్థులు
ఖమ్మం/ భద్రాద్రికొత్తగూడెం, వెలుగు: కాంగ్రెస్లో టికెట్ల టెన్షన్ కొనసాగుతోంది. ఉమ్మడి ఖమ్మం జిల్లాలోని పది నియోజకవర్గాలకు గాను రెండు సిట్టింగ్ స్థానాల్లో మాత్రమే అభ్యర్థులను తొలి జాబితాలో ప్రకటించింది. మధిర నుంచి సీఎల్పీ నేత మల్లు భట్టి విక్రమార్క, భద్రాచలం నుంచి పొదెం వీరయ్యకు ఫస్ట్ లిస్ట్ లో ప్లేస్ దక్కింది. మాజీ మంత్రి తుమ్మల నాగేశ్వరరావు ఖమ్మం నుంచి పోటీ చేయాలని ఏకంగా రాహుల్ గాంధీ, కేసీ వేణుగోపాల్ చెప్పినా తొలి జాబితాలో మాత్రం ఆయన పేరు లేదు.
ఈ పరిస్థితితో మిగతా నియోజకవర్గాల్లోని ఆశావహుల్లో ఆందోళన మొదలైంది. సెకండ్ లిస్ట్పైనే వారు గంపెడాశలు పెట్టుకున్నారు. మరో వైపు కమ్యూనిస్టులు, కాంగ్రెస్ పొత్తుల సీట్ల పంపిణీపై ఎడతెగని ఉత్కంఠ నెలకొంది. భద్రాచలం సీటును సీపీఎం కోరుకున్నప్పటికీ కాంగ్రెస్ తమ క్యాండెట్ను ప్రకటించడంతో ఆ స్థానంపై కామ్రేడ్స్ ఆశలు వదులుకున్నారు.
ఎక్కడ.. ఏ పరిస్థితి?
ఉమ్మడి జిల్లాలోని పది నియోజకవర్గాలకు గానూ కేవలం మధిర, భద్రాచలం టికెట్లను మాత్రమే కాంగ్రెస్ హైకమాండ్ ఆదివారం ఫైనల్ చేసింది. కొత్తగూడెంపై కాంగ్రెస్, సీపీఐ మధ్య పొత్తు ఇంకా ఫైనల్ కాలేదు. కాగా ఈ సీటు తమకే కావాలని సీపీఐ పట్టుబడుతోంది. కానీ కొత్తగూడెం నుంచి మాజీ ఎంపీ, టీపీసీసీ ప్రచారం కమిటీ కో చైర్మన్ పొంగులేటి శ్రీనివాస్రెడ్డి పోటీ చేస్తారంటూ ఆయన అనుచరులు కొంత కాలంగా ప్రచారం చేస్తున్నారు.
అలాగే పాలేరు నుంచి పొంగులేటి పోటీ చేస్తారన్న ప్రచారం కూడా ఉంది. రాష్ట్రంలోనే కాంగ్రెస్లో అత్యధికంగా ఇల్లెందు టికెట్కోసం 36 మందికి పైగా దరఖాస్తు చేసుకున్నారు. ఈ క్రమంలో ఇల్లెందుతో పాటు పినపాక, అశ్వారావుపేట స్థానాలపై పార్టీ హైకమాండ్ఆచితూచి అడుగులు వేస్తోంది. ఖమ్మం నుంచి తుమ్మల నాగేశ్వరరావును హైకమాండ్ ఫైనల్ చేసినా ఇంకా ప్రకటించలేదు. వైరాను పొత్తులో భాగంగా సీపీఎంకు కేటాయించే అవకాశాలున్నాయి. సత్తుపల్లి అభ్యర్థిని ఇంకా ఫైనల్ చేయలేదు.
బీఆర్ఎస్ బీఫారాలిచ్చింది.. బీజేపీ క్యాండెట్లను ప్రకటించాల్సి ఉంది..
జిల్లాలో బీఆర్ఎస్ గతంలో ప్రకటించిన క్యాండెట్లు పువ్వాడ అజయ్, కందాల ఉపేందర్ రెడ్డి, సండ్ర వెంకట వీరయ్య, మదన్ లాల్, లింగాల కమల్ రాజు, వనమా వెంకటేశ్వరరావు, రేగా కాంతారావు, భానోత్ హరిప్రియ, మెచ్చా నాగేశ్వరరావు, తెల్లం వెంక్రటావుకు బీ ఫారాలు ఇచ్చింది. అయితే ఇల్లెందు నుంచి బీఆర్ఎస్ తరుపున పోటీ చేసే సిట్టింగ్ ఎమ్మెల్యే భానోత్ హరిప్రియకు బీఫారం ఇవ్వొద్దంటూ నియోజకవర్గం వ్యాప్తంగా అసమ్మతి పెద్ద ఎత్తున రాజుకుంది.
ఇదే విషయమై అసమ్మతి నేతలు మంత్రులు కేటీఆర్, హరీశ్రావుకు మొర పెట్టుకున్నారు. కానీ ఆమెకే బీఫారం రావడంతో అసమ్మతి వర్గంలో నిరాశ నెలకొంది. మరో వైపు కొత్తగూడెం సిట్టింగ్ ఎమ్మెల్యే వనమా వెంకటేశ్వరరావుపై అనర్హత కేసు కోర్టులో నడుస్తోంది. ఈనెల 31న తీర్పు రానుంది. ఈ క్రమంలో బీ ఫారంపై కొంత ఉత్కంఠ నెలకొనగా వనమాకు బీ ఫారం ఇవ్వడంతో ఆ పార్టీ నేతలు, కార్యకర్తలు కొత్తగూడెంలో సంబరాలు చేసుకున్నారు. ఇదిలా ఉండగా బీజేపీ తరుపున పోటీ చేసే క్యాండెట్ల వివరాలను ఇంకా ప్రకటించలేదు. దీంతో టికెట్ల ఫైనల్ఇంకా ఎప్పుడని ఆశావాహులు ఆశతో ఎదురుచూస్తున్నారు. ఈ పరిస్థితులతో ఆయా నియోజకవర్గాల్లో, ఆశావహుల్లో అంతా టెన్షన్ టెన్షన్గా ఉంది.
