- ఇప్పుడేం చేద్దాం!
- ఫార్ములా- ఈ రేస్ కేసులో కేటీఆర్చుట్టూ బిగుస్తున్న ఉచ్చు
- బీఆర్ఎస్ వర్గాల్లో ఆందోళన.. లొట్టపీసు కేసు, తుపేల్ కేసు అంటూనే లోలోపల టెన్షన్
- హైకోర్టు తీర్పు వచ్చాక కేటీఆర్ ఇంటికి క్యూ కట్టిన గులాబీ నేతలు
హైదరాబాద్, వెలుగు: ఫార్ములా–ఈ రేస్ కేసులో కేటీఆర్ క్వాష్ పిటిషన్ను హైకోర్టు కొట్టివేయడం, విచారణకు అనుమతిచ్చేయడంతో బీఆర్ఎస్ నేతల్లో టెన్షన్ మొదలైంది. కేటీఆర్ సహా ఆ పార్టీ నేతలంతా ఇది లొట్టపీసు కేసు, తుపేల్ కేసు అని అంటూనే.. లోలోపల ఆందోళన చెందుతున్నారు.
ఈ నెల 9న ఏసీబీ, ఆ తర్వాత వారానికి 16న ఈడీ విచారణ ఉన్న నేపథ్యంలో కేటీఆర్ చుట్టూ ఫార్ములా– ఈ రేస్ కేసు ఉచ్చు బిగుసుకుంటుందన్న చర్చ జరుగుతున్నది. దీంతో గులాబీ పార్టీలోని పెద్ద నేతలతోపాటు కేడర్ కూడా టెన్షన్ పడుతున్నట్టు తెలుస్తున్నది.
ఈ క్రమంలోనే హరీశ్రావు, కవిత సహా మాజీ మంత్రులు, ఎమ్మెల్యేలంతా నందినగర్లోని కేటీఆర్ ఇంటికి మంగళవారం మధ్యాహ్నం నుంచే క్యూ కట్టారు. హైకోర్టు తీర్పు తర్వాత ఏం చేయాలన్న దానిపై సుదీర్ఘంగా చర్చించినట్టు సమాచారం.
హైకోర్టు తీర్పు అనంతరం జడ్జిమెంట్ కాపీపై లీగల్ టీమ్తో కేటీఆర్, పార్టీ నేతలు చర్చలు జరిపినట్టు తెలిసింది. ఇన్నాళ్లూ కోర్టులో కేసు నడుస్తున్నప్పుడు ఏసీబీ ఎలా విచారిస్తుందని ప్రశ్నించిన బీఆర్ఎస్ నేతలు.. ఇప్పుడు స్వయంగా హైకోర్టే విచారణ చేసుకోవచ్చని తేల్చి చెప్పడంతో ఎటూ తేల్చుకోలేని పరిస్థితిలో ఉన్నారన్న చర్చ పార్టీ వర్గాల్లో నడుస్తున్నది.
లాయర్ సాకుతో 6న విచారణను తప్పించుకున్న కేటీఆర్.. ఈ నెల 9న ఎట్టిపరిస్థితుల్లోనూ ఎంక్వైరీకి హాజరవ్వాల్సి ఉంటుందని చెబుతున్నారు. ఇటు సుప్రీంకోర్టులోనూ కేటీఆర్ పిటిషన్ వేయడానికి ముందే రాష్ట్ర సర్కారు కేవియెట్ దాఖలు చేసింది.
కేటీఆర్ కేసును విచారిస్తే తమ వాదనలనూ పరిగణనలోకి తీసుకోవాలని అందులో పేర్కొన్నది. ఈ క్రమంలోనే కేటీఆర్పిటిషన్ను సుప్రీంకోర్టు విచారించాల్సి వస్తే.. ఇటు రాష్ట్ర సర్కారుకు కూడా సుప్రీంకోర్టు సమాచారం ఇవ్వాల్సి ఉంటుందన్న అభిప్రాయాలు వ్యక్తమవుతున్నాయి.
ఎప్పుడు ఏమవుతుందోనని టెన్షన్
ఏసీబీ కేసులో పరిణామాలు వేగంగా మారిపోవడంతో బీఆర్ఎస్ నేతలు ఏ క్షణాన ఏమవుతుందోనన్న టెన్షన్లో ఉన్నట్టు పార్టీ వర్గాలు చెబుతున్నాయి. హైకోర్టు తీర్పు వచ్చిన వెంటనే ముఖ్య నేతలంతా కేటీఆర్ ఇంటికి వెళ్లి, పరామర్శలు మొదలుపెట్టారు.
మాజీ మంత్రి హరీశ్ రావు, బీఆర్ఎస్ ఎమ్మెల్సీ కల్వకుంట్ల కవిత మధ్యాహ్నం కేటీఆర్ ఇంటికి చేరుకొని, ఆయనతో సమావేశమయ్యారు. వివరాలు ఆరా తీశారు. వారితోపాటు మాజీ మంత్రులు జగదీశ్ రెడ్డి, ప్రశాంత్రెడ్డి, సబితా ఇంద్రా రెడ్డి, సత్యవతి రాథోడ్, మాలోతు కవిత, ఎర్రబెల్లి దయాకర్ రావు సహా సీనియర్నేతలందరూ కేటీఆర్ను కలిసి, పరామర్శించారు.
అయితే, కేటీఆర్ కడిగిన ముత్యంలా బయటకు వస్తారని బీఆర్ఎస్ నేతలంతా చెబుతున్నా.. లోలోపల మాత్రం ఆందోళనకు గురవుతున్నట్టు తెలుస్తున్నది. అవసరమైతే జైలులో పది రోజులుండి ఎక్సర్సైజులు చేసి మంచిగై వస్తానని గతంలో చెప్పిన కేటీఆరే.. ఇప్పుడు లాయర్ లేకుండా విచారణకు వెళ్లకపోవడం అందుకేనన్న చర్చ జరుగుతున్నది.
తానే ఇచ్చానంటూ ఓపెన్ కామెంట్స్
ఫార్ములా –ఈ కారు రేస్ విషయంలో నిధులను రిలీజ్ చేయాలని హెచ్ఎండీఏ వైస్ చైర్మన్గా తానే ఆదేశించానంటూ కేటీఆర్ పలుసార్లు ప్రెస్మీట్స్లోనే ఓపెన్గా చెప్పారు. ఆయనే స్వయంగా ఇచ్చిన స్టేట్మెంట్లు కావడంతో ఏసీబీ కూడా వాటిని పరిగణనలోకి తీసుకునే అవకాశం ఉందన్న అభిప్రాయాలు వ్యక్తమవుతున్నాయి.
ఈ క్రమంలోనే ఇటు ఏసీబీ, అటు ఈడీ విచారణ.. సుప్రీంలో సర్కారు పిటిషన్.. వీటన్నింటి నేపథ్యంలో ఫార్ములా –ఈ రేస్ కేసు కేటీఆర్ చుట్టూ బిగుసుకుం టున్నదన్న చర్చ నడుస్తున్నది. ఈ సారి కేటీఆర్ను పక్కా అరెస్ట్ చేస్తారన్న వాదనలు బలంగా వినిపిస్తున్నాయి.
