హైదరాబాద్, వెలుగు: తాగునీటి వ్యవస్థను మరింత మెరుగు పరిచేందుకు రాష్ట్ర ప్రభుత్వం పక్కా ప్రణాళికతో ముందుకు సాగుతున్నది. ఇందులో భాగంగా గ్రామాల్లో మంచినీటి సహాయకులకు శిక్షణ ఇస్తున్నది. మండల కేంద్రాల్లో నల్జల్మిత్ర పేరుతో 35 నుంచి 45 మంది మంచినీటి సహాయకులకు ట్రైనింగ్ ఇస్తున్నారు. 15 నుంచి 20 గ్రామాల మంచినీటి సహాయకులకు ఒకేచోట శిక్షణ ఇస్తున్నారు. రాష్ట్ర వ్యాప్తంగా 1,719 శిక్షణ కార్యక్రమాలు నిర్వహించేలా ప్రణాళిక రూపొందించగా.. ఇప్పటి వరకు 1,055 ట్రైనింగ్స్ పూర్తయ్యాయి.
మొత్తం 35 వేల నుంచి 40 వేల మంది మంచినీటి సహాయకులు శిక్షణ పూర్తి చేసుకున్నారు.మాస్టర్ ట్రైనర్లు వాటర్క్వాలిటీ టెస్టింగ్, బోర్లు, మోటార్ల మరమ్మతులు, వాటి నిర్వహణ, పైపులైన్ల లీకేజీలు, నల్లా కనెక్షన్లు, వాటర్ ట్యాంకులలో ఫ్లోరినేషన్ తదితర అంశాలపై ట్రైనింగ్ ఇస్తున్నారు. మిషన్ భగీరథ ఏఈఈలు, పంచాయతీరాజ్అధికారుల ఆధ్వర్యంలో నిర్వహిస్తున్న ఈ ట్రైనింగ్ కు మంచి స్పందన వస్తున్నది. రాష్ట్ర వ్యాప్తంగా అక్టోబర్లో శిక్షణ కార్యక్రమాలు పూర్తి చేయాలన్న సంకల్పంతో ముందుకు సాగుతోంది. నల్గొండ జిల్లాలో అత్యధిక గ్రామ పంచాయతీలు ఉండడంతో కొంత ఆలస్యమయ్యే అవకాశం ఉన్నట్టు తెలుస్తోంది.
