హైదరాబాద్, వెలుగు: డిసెంబర్ 15,16 తేదీల్లో నిర్వహించే గ్రూప్ 2 పరీక్షకు టీజీపీఎస్సీ ఏర్పాట్లు చేస్తోంది. పరీక్షకు సంబంధించిన హాల్ టికెట్లను డిసెంబర్ 9 నుంచి టీజీపీఎస్సీ వెబ్ సైట్లో అందుబాటులో ఉంటాయని కమిషన్ సెక్రటరీ నవీన్ నికోలస్ తెలిపారు. రెండు రోజుల పాటు నాలుగు పేపర్లు నిర్వహిస్తున్నట్టు చెప్పారు. మోడల్ ఓఎంఆర్ షీటును https://www.tspsc.gov.in వెబ్ సైట్లో పెట్టినట్టు పేర్కొన్నారు.
డిసెంబర్ 15న ఉదయం10 నుంచి మధ్యాహ్నం 12.30గంటల వరకూ పేపర్-1– జనరల్ స్టడీస్ అండ్ జనరల్ ఎబిలిటీస్, మధ్యాహ్నం 3 నుంచి సాయంత్రం 5.30 గంటల వరకూ పేపర్-2– చరిత్ర, రాజకీయ శాస్త్రం అండ్ సమాజం, 16వ తేదీన ఉదయం 10గంటల నుంచి మధ్యాహ్నం 12.30గంటల వరకూ పేపర్-3– ఆర్థిక వ్యవస్థ అండ్ అభివృద్ధి, మధ్యాహ్నం 3గంటల నుంచి సాయంత్రం 5.30 గంటల వరకూ పేపర్ 4 – తెలంగాణ ఉద్యమం అండ్ రాష్ట్ర ఏర్పాటు పరీక్ష జరగనున్నది.
