- ఒక్కసారి చార్జింగ్ చేస్తే 325 కిలోమీటర్లు
- రెండున్నర గంటల్లోనే బ్యాటరీ ఫుల్ చార్జ్
- కరీంనగర్లో 35 బస్సులు ప్రారంభించిన మంత్రి పొన్నం
- దశలవారీగా ఆర్టీసీకి 2,400 ఎలక్ట్రిక్ బస్సులు
కరీంనగర్, వెలుగు: ఆర్టీసీలో తొలిసారిగా ఎలక్ట్రిక్ సూపర్ లగ్జరీ బస్సులు అందుబాటులోకి వచ్చాయి. కరీంనగర్ జిల్లా కేంద్రంలో 35 బస్సులను మంత్రి పొన్నం ప్రభాకర్ ఆదివారం ప్రారంభించారు. 41 సీట్లతో కూడిన ఈ బస్సును 2.30 గంటలు ఫుల్ చార్జింగ్ చేస్తే 325 కిలో మీటర్లు ప్రయాణిస్తుంది. ఇందులో డ్రైవర్ క్యాబిన్లో ఒకటి, ప్రయాణికులు కూర్చునే దగ్గర మరో సెక్యూరిటీ కెమెరా ఉంటుంది. కరీంనగర్- 2 డిపో, వరంగల్, నిజామాబాద్, నల్గొండ, సూర్యాపేట, హైదరాబాద్- 2 డిపోల ద్వారా ఎలక్ట్రిక్ బస్సులను గ్రాస్ కాస్ట్ కాంట్రాక్ట్ (జీసీసీ) పద్ధతిలో నడిపేందుకు మేజర్స్ జేబీఎం సంస్థతో టీజీఆర్టీసీ సంస్థ ఇటీవల ఒప్పందం కుదుర్చుకుంది. వచ్చే ఏడాది మార్చిలోగా 500 ఎలక్ట్రిక్ బస్సులను జేబీఎం సంస్థ సమకూర్చనున్నది.
కరీంనగర్కు 74 బస్సులు
కరీంనగర్- 2 డిపోకు 74 ఎలక్ట్రిక్ బస్సులు కేటాయించగా.. ఇందులో సూపర్ లగ్జరీ 35, డీలక్స్ -6, ఎక్స్ ప్రెస్ 33 బస్సులు ఉన్నాయి. ప్రస్తుతం 35 సూపర్ లగ్జరీ -బస్సులు డిపోకు చేరుకున్నాయి. కరీంనగర్- 2 డిపోలో బస్సుల చార్జింగ్ కోసం ఇప్పటికే 11 కేవీ విద్యుత్ లైన్లు, 14 చార్జింగ్ పాయింట్లు, మూడు ఎలక్ట్రిక్ ట్రాన్స్ ఫార్మర్లు బిగించారు. ఈ 35 బస్సులను కరీంనగర్ నుంచి జేబీఎస్ కు నాన్ స్టాప్ పద్ధతిలో నడపనున్నారు. ప్రతి 20 నిమిషాలకో బస్సు నడపాలని అధికారులు ప్లాన్ చేశారు. కరీంనగర్ – హైదరాబాద్ కు చార్జీని రూ.330గా నిర్ణయించారు. ఎలక్ట్రిక్ డీలక్స్, ఎక్స్ ప్రెస్ బస్సులు వచ్చాక మంథని, గోదావరిఖని, జగిత్యాల, సిరిసిల్ల, కామారెడ్డికి నాన్ స్టాప్ పద్ధతిలో నడపనున్నారు.
త్వరలో నిజామాబాద్ 2 డిపోకు 67 బస్సులు
సీఎం రేవంత్ రెడ్డి ఆదేశాల మేరకు దశలవారీగా 2,400 ఎలక్ట్రిక్ బస్సులను కొనుగోలు చేసేందుకు టీజీ ఆర్టీసీ కసరత్తు చేస్తున్నది. కరీంనగర్ జిల్లాకు పంపినట్లే త్వరలో నిజామాబాద్ -2 డిపోకు 67 ఎలక్ట్రిక్ బస్సులు (సూపర్ లగ్జరీ 13, ఎక్స్ ప్రెస్ 54), వరంగల్ కు 86, సూర్యాపేటకు 52, నల్లగొండకు 65, హైదరాబాద్ -2 డిపోకు 74 ఎలక్ట్రిక్ బస్సులు అందుబాటులోకి రానున్నాయి. నిజామాబాద్ – హైదరాబాద్ బస్సు చార్జీని రూ360గా నిర్ణయించారు.
మరిన్ని బస్సులు కొంటాం: మంత్రి పొన్నం
మహాలక్ష్మి స్కీమ్తో ప్రయాణికుల రద్దీ పెరిగిందని, దానికి అనుగుణంగా బస్సులు పెంచుతున్నామని మంత్రి పొన్నం ప్రభాకర్ అన్నారు. కొత్త బస్సులకు సరిపడా ఉద్యోగ ఖాళీలను భర్తీ చేస్తామని తెలిపారు. ఇప్పటికే 3,035 పోస్టుల నియామక ప్రక్రియ కొనసాగుతున్నదని అ న్నారు. రాష్ట్ర ప్రభుత్వ గ్రాంట్స్తో మరిన్ని కొత్త బస్సులు కొనేందుకు టీజీఆర్టీసీ మేనేజ్మెంట్ ప్రణాళికలు సిద్ధం చేస్తున్నదన్నారు. కరీంనగర్లోని అంబేద్కర్ స్టేడియంలో ఆదివారం 35 ఎలక్ట్రిక్ సూపర్ లగ్జరీ బస్సుల ప్రారంభోత్సవానికి మంత్రి హాజరై మాట్లాడారు.
మహిళా సంఘాలకు ఆర్టీసీ అద్దె బస్సులు కేటాయించాలని ప్రభుత్వం నిర్ణయించినట్లు తెలిపారు. ఈ మేరకు మెప్మాతో సంప్రదింపులు జరుగుతున్నామన్నారు. ఎలక్ట్రిక్ బస్సులు నాన్స్టాప్గా నడుస్తాయని, తక్కువ సమయంలోనే కరీంనగర్ నుంచి హైదరాబాద్కు చేరుకోవచ్చని టీజీఆర్టీసీ ఎండీ సజ్జనార్ అన్నారు. కాగా, ఈ కార్యక్రమానికి మంత్రి పొన్నం హాజరైనప్పటికీ.. మహాలక్ష్మి మీరే అంటూ కలెక్టర్ పమేలా సత్పతి చేతుల మీదుగా ఎలక్ట్రిక్ బస్సుల ప్రారంభోత్సవ రిబ్బన్ను కట్ చేయించారు. ఈ కార్యక్రమంలో ఎమ్మెల్యేలు కవ్వంపల్లి సత్యనారాయణ, మేడిపల్లి సత్యం, సంజయ్ కుమార్, కరీంనగర్ మేయర్ సునీల్ రావు తదితరులు పాల్గొన్నారు.
