సీనియర్ దర్శకులు ముత్యాల సుబ్బయ్య సమర్పణలో ఆయన కొడుకు ముత్యాల అనంత కిషోర్ నిర్మిస్తున్న తొలి చిత్రం ‘తల్లి మనసు’. వి శ్రీనివాస్ (సిప్పీ) దర్శకుడిగా పరిచయమవుతున్నాడు. రచిత మహాలక్ష్మి, కమల్ కామరాజు, సాత్విక్, సాహిత్య ముఖ్య పాత్రలు పోషిస్తున్నారు. ఈ మూవీ షూటింగ్ ఇప్పటికే 80 శాతం పూర్తయిందని తెలియజేశారు నిర్మాత. ఈ సందర్భంగా ఆయన మాట్లాడుతూ ‘మిగతా టాకీ పార్ట్‌‌తో పాటు ఒక పాటను చిత్రీకరించాల్సి ఉంది.
ఈ నెలాఖరుకు మొత్తం షూటింగ్ ముగుస్తుంది. సింగిల్ షెడ్యూల్‌‌లో షూటింగ్ పూర్తి చేస్తున్నాం’ అని చెప్పారు. ఓ మధ్య తరగతి తల్లి చుట్టూ తిరిగే చక్కటి కుటుంబ కథా చిత్రమిదని, ఆమె మనోవేదన, సంఘర్షణను ఇందులో చూపించనున్నట్టు దర్శకుడు సిప్పీ తెలియజేశాడు. రఘుబాబు, శుభలేఖ సుధాకర్, దేవీప్రసాద్, ఆదర్శ్ బాలకృష్ణ ఇతర పాత్రలు పోషిస్తున్నారు.
