భూమి రిజిస్ట్రేషన్ చేస్తలేడని చంపేసిండు
మంచిర్యాల రియల్ ఎస్టేట్ వ్యాపారి హత్య కేసులో ఇద్దరి అరెస్ట్
కోల్బెల్ట్ , వెలుగు : మంచిర్యాలకు చెందిన రియల్ ఎస్టేట్ వ్యాపారి నడిపెల్లి లక్ష్మీకాంతారావును హత్య చేసిన నిందితులు మామిడి శ్రీనివాస్, దాసరి శ్రీనివాస్ను గురువారం పోలీసులు అరెస్టు చేశారు. మంచిర్యాల డీసీపీ ఆఫీస్లో ఏర్పాటు చేసిన మీడియా సమావేశంలో మంచిర్యాల డీసీపీ, ఐపీఎస్ ఆఫీసర్ రామనాథ్ కేకన్, బెల్లంపల్లి ఏసీపీ పంతటి సదయ్య వివరాలు వెల్లడించారు.. జయశంకర్ భూపాలపల్లి జిల్లా కొండాపూర్కు చెందిన మామిడి శ్రీనివాస్ రెండేళ్లుగా నస్పూర్లో ఉంటూ మంచిర్యాల చుట్టుపక్కల ప్రాంతాల్లో రియల్ ఎస్టేట్ చేస్తున్నాడు.
మంచిర్యాలకు చెందిన రియల్ ఎస్టేట్ వ్యాపారి నడిపెల్లి లక్ష్మీకాంతారావు, అతడి భార్య పద్మ, మరో నలుగురు కలిసి రియల్ ఎస్టేట్ బిజినెస్ కోసం నస్పూర్ మండలం తీగల్పహాడ్ సీసీసీ ఏరియాలో 2019లో 5.21 ఎకరాల భూమి కొన్నారు. ఏడాదిన్నర కింద ఈ భూమిని మామిడి శ్రీనివాస్ కొని అగ్రిమెంట్ చేసుకొని లక్ష్మీకాంతారావుకు రూ.30లక్షలు ఇచ్చాడు. భూమి రిజిస్ర్టేషన్ చేయించాలని శ్రీనివాస్ అడిగిన ప్రతీసారి లక్ష్మీకాంతారావు వాయిదా వేస్తుండడంతో ఇద్దరి మధ్య గొడవలు పెరిగాయి. రిజిస్ర్టేషన్కు మిగిలినవాళ్లు ఒప్పుకున్నా లక్ష్మీకాంతారావు సహకరించడంలేదని, అతన్ని చంపితేనే సమస్య పరిష్కారమవుతుందని భావించిన మామిడి శ్రీనివాస్, తన స్నేహితుడైన కాగజ్నగర్కు చెందిన దాసరి శ్రీనివాస్ సహాయం కోరాడు.
ఇందుకు కొంత డబ్బు ఇస్తానని చెప్పడంతో దాసరి శ్రీనివాస్ ఒప్పుకున్నాడు. ఈ క్రమంలో ఈనెల 11న మందమర్రి మండలం గద్దెరాగడిలోని తనకు చెందిన భూమిలో ఎవరో ఇంటి నిర్మాణ పనులు చేస్తున్నారని, అక్కడికి వెళ్లి సెంట్రింగ్ కూలగొడితే భూమి రిజిస్ర్టేషన్ చేస్తానని లక్ష్మీకాంతారావు మామిడి శ్రీనివాస్కు చెప్పాడు. దీంతో స్నేహితుడైన దాసరి శ్రీనివాస్ను వెంటపెట్టుకొని బైక్పై గద్దెరాగడి గ్రామం వెళ్లి అక్కడ కడుతున్న ఇంటి సెంట్రింగ్ను కూలగొట్టి లక్ష్మీకాంతారావుకు సమాచారం అందించాడు. రిజిస్ర్టేషన్పై మళ్లీ దాటవేసే ప్రయత్నాలు చేయడంతో కోపం పెంచుకున్న మామిడి శ్రీనివాస్ లక్ష్మీకాంతారావును ఎలాగైనా చంపాలని నిర్ణయించుకొని గద్దెరాగడి వస్తే మాట్లాడుకుందామంటూ పిలిచాడు. ప్లాన్ ప్రకారం నిందితులు ముందుగానే కత్తిని తీసుకొచ్చి ఖాళీగా ఉన్న షెడ్లో దాచి ఉంచారు.
లక్ష్మీకాంతారావు రాగానే భూమి రిజిస్ర్టేషన్ విషయంపై మామిడి శ్రీనివాస్ గొడవపడుతుండగా దాసరి శ్రీనివాస్ పరిసరాల్లోకి ఎవరూ రాకుండా కాపలా కాశాడు. కోపంతో మామిడి శ్రీనివాస్ వెంట తెచ్చుకున్న కత్తితో లక్ష్మీకాంతారావు తల, ముఖంపై దాడి చేసి చంపాడు. అనంతరం బైక్పై ఇద్దరు పరారయ్యారు. గురువారం ఇద్దరు నిందితులను అరెస్టు చేసి రిమాండ్ పంపి వారి నుంచి హత్యకు వాడిన కత్తి, బైక్ను పోలీసులు స్వాధీనం చేసుకున్నారు.
