న్యూయార్క్: అమెరికా అధ్యక్ష ఎన్నికలు మరో పది రోజుల్లో జరగనున్నాయి. ఈ నేపథ్యంలో అటు రిపబ్లికన్, ఇటు డెమోక్రటిక్ క్యాండిడేట్లు డొనాల్డ్ ట్రంప్, కమలా హారిస్ జోరుగా ఎన్నికల ప్రచారం చేస్తున్నారు. అయితే, ఇదే అదనుగా చూసుకొని చైనా హ్యాకర్లు రెచ్చిపోతున్నారు. వీరి ఫోన్ కమ్యూనికేషన్లే టార్గెట్గా హ్యాకింగ్కు పాల్పడుతున్నారు. వీరి ఫోన్ల డేటాను దొంగిలిస్తున్నట్టు న్యూయార్క్ టైమ్స్ పత్రిక వెల్లడించింది. డొనాల్డ్ ట్రంప్, కమలా హారిస్కు సంబంధించిన ఫోన్ల వెరిజోన్ సిస్టమ్లోకి ప్రవేశించి డేటాను దొంగిలించేందుకు యత్నిస్తున్నట్టు కథనం పేర్కొన్నది.
ట్రంప్, హారిస్తోపాటు వీరి రన్నింగ్ మేట్స్ జేడీ వాన్స్, టిమ్ వాజ్ ఫోన్లను కూడా హ్యాక్ చేస్తున్నట్టు తెలిపింది. ఎన్నికల క్యాంపెయినింగ్కు సంబంధించిన డేటాను దొంగిలిస్తున్నట్టు పేర్కొన్నది. అయితే, ఎలాంటి డేటాను వారు తస్కరించారో తెలుసుకునేందుకు పరిశోధన బృందం పని చేస్తున్నదని వెల్లడించింది. ఈ కథనంపై ఎఫ్‌‌బీఐ, సైబర్ సెక్యూరిటీ ఏజెన్సీ సంయుక్త ప్రకటన విడుదల చేశాయి. దీనిపై దర్యాప్తు చేస్తున్నట్లు తెలిపాయి.
హ్యాకింగ్ పై స్పందించని ట్రంప్, హారిస్ ఎలక్షన్ క్యాంపెయిన్ టీమ్ లు
ట్రంప్, వాన్స్ ఫోన్లు టార్గెట్అయినట్టు ట్రంప్ క్యాంపెయిన్ ఇప్పటివరకూ ధ్రువీకరించలేదు. అయితే, ట్రంప్ గెలవకుండా యూఎస్ మౌలిక సదుపాయాలపై దాడి చేసేలా ఇరాన్, చైనాను వైస్ ప్రెసిడెంట్ కమలా హారిస్ ప్రోత్సహించారని రిపబ్లికన్ పార్టీ క్యాంపెయిన్ కమ్యూనికేషన్ డైరెక్టర్ స్టీవెన్ చియుంగ్ ఆరోపించారు. ఇదిలా ఉండగా, ఈ హ్యాకింగ్పై అటు హారిస్ టీం కూడా స్పందించలేదు. ఇంటెలిజెన్స్ సమచారాన్ని సేకరించేందుకు అమెరికా టెలీకమ్యూనికేషన్ ప్రొవైడర్లను విదేశీ హ్యాకర్లు టార్గెట్ చేస్తున్నట్టు తమకు తెలుసని, ఈ విషయాన్ని ఇన్వెస్టిగేషన్ ఏజెన్సీల దృష్టికి తీసుకెళ్లామని వెరిజోన్ బృందం ఒక ప్రకటనలో తెలిపింది. కాగా, చైనా ప్రభుత్వం మద్దతు ఉన్న సైబర్ ముఠా ‘సాల్ట్‌ టైఫూన్‌’ ఈ హ్యాకింగ్కు పాల్పడి ఉంటుందని సైబర్ సెక్యూరిటీ నిపుణులు అంచనా వేస్తున్నారు.
అమెరికా ఎన్నికల్లో మేం జోక్యం చేసుకోం: చైనా
సైబర్ అటాక్స్, సైబర్ దొంగతనాలను చైనా వ్యతిరేకిస్తుందని, వాటిపై పోరాడుతుందని వాషింగ్టన్లోని చైనా ఎంబసీ పేర్కొన్నది. ‘ప్రెసిడెంట్ ఎన్నికలు అమెరికా అంతర్గత వ్యవహారం. అందులో చైనా జోక్యం చేసుకోదు” అని ఎంబసీ స్పోక్స్ పర్సన్ స్పష్టం చేశారు.
