న్యూఢిల్లీ: ‘ఇంటర్నేషనల్ సొసైటీ ఫర్ క్రిష్ణ కాన్సియస్నెస్(ఇస్కాన్)’ అనేది మత ఛాందసవాద సంస్థ అని బంగ్లాదేశ్ ప్రభుత్వం పేర్కొన్నది. ఆ సంస్థపై అధ్యయనం చేస్తున్నామని సుప్రీంకోర్టుకు వెల్లడించింది. దేశంలో ఇస్కాన్ సంస్థను నిషేధిచాలంటూ కోర్టులో ఓ పిటిషన్ దాఖలైంది. దీనిపై బుధవారం కోర్టు విచారణ చేపట్టింది. గత కొన్ని రోజులుగా దేశంలో ఇస్కాన్ వల్ల అల్లర్లు జరుగుతున్నాయని పిటిషనర్ తరఫు లాయర్ వాదించారు. సనాతన్‌ జాగరణ్‌ మంచ్‌ ప్రతినిధి, ఇస్కాన్ సంస్థకు చెందిన చిన్మయ్ కృష్ణదాస్ బ్రహ్మచారి బెయిల్ నిరాకరణ తర్వాత చెలరేగిన ఘర్షణలు, లాయర్ మృతిచెందిన విషయాన్ని ప్రస్తావించారు.
దీంతో ఇస్కాన్ గురించి అటార్నీ జనరల్ను కోర్టు ఆరా తీయగా, ఆయన ప్రభుత్వం తరఫున అఫిడవిట్ సమర్పించారు. ఇస్కాన్ ఒక మత ఛాందసవాద సంస్థ అని తెలిపారు. ఆ సంస్థను నిషేధించే ఆలోచనలో ఉన్నట్టు వెల్లడించారు. దీంతో.. ఇస్కాన్‌‌పై ప్రభుత్వం తీసుకోబోయే నిర్ణయాన్ని గురువారం ఉదయం కల్లా తెలపాలని కోర్టు ఆదేశించింది. కాగా, కృష్ణదాస్ అరెస్ట్ కు వ్యతిరేకంగా జరిగిన అల్లర్లలో ఓ లాయర్ హత్యకు గురైన ఘటనకు సంబంధించి 30 మందిని పోలీసులు అరెస్ట్ చేశారు.
అవినీతి కేసులో నిర్దోషిగా ఖలీదా జియా..
అవినీతి కేసులో జైలు శిక్ష అనుభవిస్తున్న బంగ్లాదేశ్ మాజీ ప్రధాని, బీఎన్పీ చైర్పర్సన్ ఖలీదా జియాను ఆ దేశ సుప్రీంకోర్టు నిర్దోషిగా తీర్పు చెప్పింది. జియా చారిటబుల్ ట్రస్ట్ అవినీతి కేసులో 2018లో జియా (79)కు ఢాకా కోర్టు ఏడేండ్ల జైలు శిక్ష, 10 లక్షల జరిమానా విధించింది. దీంతో ఆమె ఓల్డ్ ఢాకా సెంట్రల్ జైలులో శిక్ష అనుభవిస్తున్నారు. ఈ కేసులో మరో ఇద్దరినీ కోర్టు నిర్దోషులుగా ప్రకటించింది.
మైనార్టీల పరిస్థితి ఆందోళనకరం: మాజీ మంత్రి
బంగ్లాదేశ్లో మైనార్టీల పరిస్థితి ఆందోళనకరంగా ఉన్నదని ఆ దేశ విదేశాంగ శాఖ మాజీ మంత్రి హసన్ మహ్మద్ ఆందోళన వ్యక్తం చేశారు. మహ్మద్ యూనస్ నేతృత్వంలోని తాత్కాలిక సర్కారు ప్రజాస్వామ్య దేశంలో అసమ్మతిని రాజేస్తున్నదని మండిపడ్డారు. అజ్ఞాతంలో ఉన్న ఆయన బుధవారం పీటీఐతో టెలిఫోన్ ఇంటర్వ్యూలో మాట్లాడారు. యూనస్ సర్కారు కారణంగా బంగ్లాదేశ్ లో టెర్రరిస్టు సంస్థలు రెచ్చిపోతున్నాయని, మైనార్టీలపై దాడులు పెరుగుతున్నాయని హసన్ మహ్మద్ తెలిపారు.
