నిజామాబాద్ అర్బన్, వెలుగు : బీఆర్ఎస్ తొమ్మిదేండ్ల పాలనలో ఇచ్చిన హామీలను నెరవేర్చడంలో విఫలమైందని ఆరోపిస్తూ బీజేపీ లీడర్లు నిజామాబాద్ కలెక్టరేట్ ను ముట్టడించారు. బీజేపీ రాష్ట్ర కార్యవర్గ సభ్యుడు ధన్పాల్ సూర్యనారాయణ మాట్లాడుతూ.. ఎన్నికల సమయంలో లెక్కకుమించి హామీలిస్తున్న ప్రభుత్వం, గద్దెనెక్కగానే వాటిని విస్మరిస్తూ ప్రజల్ని మోసం చేస్తోందన్నారు. సీఎం కేసీఆర్ ఇచ్చిన హామీలను గుర్తు చేసి, వాటిని అమలు చేయాలనే డిమాండ్తో నిరసనలు తెలిపితే, పోలీసులు ముందస్తుగా అరెస్టులు చేయడం, నిర్బంధించడం సరికాదన్నారు. ప్రభుత్వం ఎన్ని విధాల ఆపే ప్రయత్నం చేసినా, బీఆర్ఎస్ వైఫల్యాలను ప్రజల్లోకి తీసుకెళ్తామన్నారు. కలెక్టరేట్ను ముట్టడించేందుకు వచ్చిన బీజేపీ లీడర్లను అడ్డుకున్న పోలీసులు, వారిని అక్కడి నుంచి తరలించారు.
బోధన్ : నిజామాబాద్ కలెక్టరేట్ను ముట్టడించేందుకు వెళ్తున్న బీజేపీ లీడర్లను సోమవారం పోలీసులు అరెస్ట్ చేశారు. పార్టీ రాష్ట్ర కార్యవర్గ సభ్యులు మేడపాటి ప్రకాశ్రెడ్డిని హౌస్ అరెస్ట్ చేశారు. బీజేపీ పట్టణాధ్యక్షుడు కొలిపాక బాలరాజ్, జిల్లా కార్యదర్శి సుధాకర్చారి తదితరులను అదుపులోకి తీసుకున్నారు.
నవీపేట్ : పార్టీ పిలుపు మేరకు కలెక్టరేట్ ముట్టడికి బయలు దేరిన బీజేపీ లీడర్లను నవీపేట్ పోలీసులు అరెస్ట్ చేశారు. బీజేవైఎం జిల్లా వైస్ ప్రెసిడెంట్ పిల్లి శ్రీకాంత్ మాట్లాడుతూ కేసీఆర్ ప్రభుత్వం ఎన్నికల సమయంలో ఇచ్చిన నిరుద్యోగ భృతి, డబుల్ బెడ్ రూమ్ ఇండ్లు లాంటి అనేక హామీలను నెరవేర్చలేదన్నారు. అరెస్టయిన వారిలో లీడర్లు శ్రీనివాస్ గౌడ్, రామకృష్ణ, ఆనంద్, రాజేందర్గౌడ్ ఉన్నారు.
