మహబూబ్ నగర్ కలెక్టరేట్, వెలుగు: ముస్లింలను మరోసారి మోసం చేయడానికి లక్ష రూపాయల ఆర్థికసాయం అందిస్తామని బీఆర్ఎస్ ప్రభుత్వం ప్రకటించిందని టీపీసీసీ అధికార ప్రతినిధి జహీర్ అక్తర్ ఆరోపించారు. శుక్రవారం కాంగ్రెస్ పార్టీ ఆఫీసులో మీడియాతో మాట్లాడారు. ఎన్నికలు దగ్గర పడినప్పుడే బీఆర్ఎస్ కు మైనార్టీలు గుర్తుకొస్తారని విమర్శించారు. మైనార్టీలకు 12 శాతం రిజర్వేషన్ కల్పిస్తామని ప్రకటించి, 9 ఏండ్లు గడుస్తున్నా ఎందుకు అమలు చేయలేదని ప్రశ్నించారు.
ముస్లింలను ఓటు బ్యాంకుగా వాడుకుంటోందని ఆరోపించారు. టీపీసీసీ ప్రధాన కార్యదర్శి సంజీవ్ ముదిరాజ్ మాట్లాడుతూ మంత్రి హరీశ్రావు ముస్లింలను ఫకీర్లని మాట్లాడడం సరైంది కాదన్నారు. వెంటనే క్షమాపణలు చెప్పాలని డిమాండ్ చేశారు. సీజే బెనహర్, అనిత, సిరాజ్ ఖాద్రీ, లక్ష్మణ్ యాదవ్, అజ్మత్ అలీ, జహీర్ పాల్గొన్నారు.
హరీశ్ రావు దిష్టిబొమ్మ దహనం
గద్వాల టౌన్, వెలుగు : ముస్లింలపై అనుచిత వ్యాఖ్యలు చేసిన మంత్రి హరీశ్రావు దిష్టిబొమ్మను కాంగ్రెస్ పార్టీ ఆధ్వర్యంలో శుక్రవారం వైఎస్సార్ చౌరస్తాలో దహనం చేశారు. ఈ సందర్భంగా పట్టణ అధ్యక్షుడు ఇసాక్ మాట్లాడుతూ మంత్రి వెంటనే ముస్లింలకు క్షమాపణలు చెప్పాలని డిమాండ్ చేశారు. మరో సారి ముస్లింలపై అనుచిత వ్యాఖ్యలు చేస్తే సహించేది లేదన్నారు. జమాల్, ముఖ్రం, మాజీద్, జహంగీర్, రఫీ పాల్గొన్నారు.
