- ఆమె రక్తంలో విషపదార్థాలు లేవని తేల్చిన టాక్సికాలజీ రిపోర్ట్
- పోలీసులకు దొరికిన ‘సక్సీనైల్ కోలిన్‍’ ఇంజక్షన్ కథేంటి?
- మర్డర్‍ చేశారంటున్న ప్రీతి ఫ్యామిలీ, అపొజిషన్ లీడర్లు
- వరంగల్ పోలీసులకు పెద్ద సవాల్గా మారిన కేసు
- అనుమానాస్పద మృతి కేసుగా మార్చే అవకాశం?
వరంగల్, వెలుగు:మెడికో ధరావత్ ప్రీతి కేసు మిస్టరీగా మారింది. తాజాగా విడుదలైన టాక్సికాలజీ రిపోర్ట్ తో ఆమె మృతిపై మరిన్ని అనుమానాలు అలుముకున్నాయి. ఆమె గుండె, కాలేయం, రక్తం, ఇతర అవయవాల్లో ఎలాంటి విష పదార్థాలు లేవని టాక్సికాలజీ రిపోర్ట్ నిర్ధారించింది. దీంతో ఆమెది హత్యా? ఆత్మహత్యా? అనే దానిపై సస్పెన్స్ నెలకొంది. ప్రీతిది ఆత్మహత్యేనని పోలీసులు చెబుతుండగా.. ముమ్మాటికీ హత్యేనని ఆమె కుటుంబ సభ్యులు ఆరోపిస్తున్నారు. నిమ్స్ ఆస్పత్రిలో డయాలసిస్ పేరిట ప్రీతి కడుపును క్లీన్ చేయడంవల్ల ఆధారాలు లేకుండా చేశారని ప్రీతి పేరెంట్స్ మొదటి నుంచీ అంటున్నారు. అయినా ఇప్పటివరకు ఆత్మహత్య కోణంలోనే పోలీసులు కేసును దర్యాప్తు చేశారు. ఈ నేపథ్యంలో సోమవారం వచ్చిన టాక్సికాలజీ రిపోర్ట్ఎన్నో కొత్త ప్రశ్నలను వరంగల్ పోలీసుల ఎదుట నిలిపింది. ప్రీతి కుటుంబ సభ్యులు, అపొజిషన్ లీడర్లు లేవనెత్తుతున్న అనుమానాలకు ఈ రిపోర్ట్బలం చేకూరుస్తున్నది. దీంతో ఇకపై విచారణను ఎలా ముందుకు తీసుకెళ్లాలన్నది పోలీసులకు అంతుచిక్కడం లేదు. కేసును అనుమానాస్పద మృతిగా మారుస్తారా? అనే వాదనలు కూడా వినిపిస్తున్నాయి. టాక్సికాలజీ రిపోర్ట్ మాత్రమే ఫైనల్ కాదని, కొన్నిసార్లు అవయవాల్లోని మత్తు పదార్థాల ఆనవాళ్లను గుర్తించడం కష్టమవుతుందని పలువురు పోలీసు అధికారులు చెబుతున్నారు. ఇంకా రావాల్సి ఉన్న ఫోరెన్సిక్ సైన్స్ ల్యాబ్ (ఎఫ్ఎస్ఎల్) రిపోర్టులపైనా తీవ్ర ఉత్కంఠ నెలకొంది.
నేర విచారణ విభాగంలో ఎంతో పురోగతి సాధించినట్టు చెప్పుకుంటున్న రాష్ట్ర ప్రభుత్వం రెండు వారాలైనా ప్రీతి మరణానికి కారణమేంటో తేల్చలేకపోయింది.ఫిబ్రవరి 22న సూసైడ్ అటెంప్ట్ చేసుకున్న ప్రీతి హైదరాబాద్‍ నిమ్స్లో ట్రీట్‍మెంట్ పొందుతూ ఫిబ్రవరి 26న చనిపోయింది. ఘటన జరిగిన రోజే ఎంజీఎంలో ఆమె రక్త నమూనాలను సేకరించినట్లు అధికారులు తెలిపారు. వరంగల్ పోలీస్ కమిషనర్ రంగనాథ్ కూడా ఇదే విషయాన్ని ఫిబ్రవరి 24న మీడియాతో చెప్పారు. గదిలో ప్రీతి పడిపోయినచోట 'సక్సీనైల్ కోలిన్‍' ఇంజక్షన్ దొరికిందని.. అంతకుముందు దాని గురించి ప్రీతి గూగుల్‍లో సెర్చ్చేసినట్లు పేర్కొన్నారు. టాక్సికాలజీ రిపోర్ట్కోసం బ్లడ్ శాంపిల్స్ తీశామని, రిపోర్ట్వచ్చాక పూర్తి వివరాలు ఇస్తామన్నారు. దాదాపు 10 రోజుల తర్వాత వచ్చిన రిపోర్టులో ఆమె శరీరంలో విష పదార్థాలు లేవని తేలడంతో.. ఆ ఇంజక్షన్ ఏమైందన్న సందేహాలు కలుగుతున్నాయి. తన కూతురు ప్రీతిని సీనియర్ స్టూడెంట్సైఫ్‍ మానసికంగా, శారీరకంగా ఇబ్బందులకు గురిచేశాడని ప్రీతి తండ్రి నరేందర్ ఫిబ్రవరి 22న వరంగల్ మట్వాడ పోలీసులకు ఫిర్యాదు చేశారు. దీంతో సైఫ్పై ర్యాగింగ్‍, ఎస్సీ ఎస్టీ అట్రాసిటీ నమోదు చేశారు. 24న పోలీసులు సైఫ్ ను అరెస్ట్ చేశారు. అతన్ని మొదట పరకాల సబ్ జైలుకు.. ఆపై ఖమ్మం జైలుకు తరలించారు. కేఎంసీ, ఎంజీఎంలో పోలీసులు టెక్నికల్ టీంతో కలిసి విచారణ కొనసాగించారు. ఈక్రమంలో కాలేజీ అధికారులు, డ్యూటీ డాక్టర్లు, ప్రీతి ఫ్రెండ్స్, సీనియర్లు, క్లాస్‍మేట్లు, ఎంజీఎం సిబ్బందితో మాట్లాడి వివరాలు రాబట్టారు. వాట్సాప్‍ చాటింగ్లు, ఫోన్‍కాల్ డేటాను సేకరించారు.
సైఫ్.. మళ్లీ ఖమ్మం జైలుకు
మెడికో ప్రీతి ఆత్మహత్య కేసులో నిందితుడైన కేఎంసీ పీజీ స్టూడెంట్ సైఫ్ నాలుగురోజుల కస్టడీ గడువు సోమవారంతో ముగిసింది. టాక్సికాలజీ రిపోర్టు నేపథ్యంలో మరో నాలుగు రోజుల పాటు సైఫ్ను కస్టడీకి ఇవ్వాలని పోలీసులు సోమవారం కోర్టును కోరినా.. దాన్ని జడ్జి పెండింగ్లో పెట్టారు. దీంతో వరంగల్ పోలీసులు అతన్ని ఖమ్మం జైలుకు తరలించారు. కస్టడీలో ఉండగా సైఫ్ను పోలీసులు వివిధ కోణాల్లో ఎంక్వైరీ చేసినట్లు తెలుస్తోంది.
